روم (نمائندہ وائس آف جرمنی): وفاقی وزیر داخلہ محسن نقوی نے روم میں پاکستانی سفارتخانے کا دورہ کیا، وفاقی وزیر اوورسیز پاکستانیز و ترقی انسانی وسائل چودھری سالک حسین بھی ہمراہ تھے۔ اٹلی میں پاکستان کے سفیر علی جاوید نے وفاقی وزراء کا استقبال کیا اور سفارتخانے کے افسران سے تعارف کرایا۔وفاقی وزراء محسن نقوی اور چودھری سالک حسین نے سفارتخانے میں پاسپورٹ سیکشن کا معائنہ کیا اور سیکشن میں موجود اوورسیز پاکستانیوں سے ملاقات کی اور ان کے مسائل سنے۔
وفاقی وزیر اوورسیز پاکستانیز چودھری سالک حسین نے سیکشن میں موجود منڈی بہاؤالدین اور گجرات سے تعلق رکھنے والے لوگوں سے بھی ملے اور ان کے مسائل سنے۔ وفاقی وزیر اوورسیز پاکستانیز سالک حسین نے متعلقہ حکام کو فون کرکے لوگوں کے مسائل موقع پر حل کئے۔
وفاقی وزیر داخلہ محسن نقوی نے کہا کہ سمندر پار پاکستانیوں کی سہولت کیلئے صوبوں سے ہونی والی پولیس تصدیق کے لئے بہترین نظام بنانے کے لئے فوری کام کریں گے۔
وزیر داخلہ نے پاسپورٹ کی مقررہ مدت میں اجراء کے لیے بھی احکامات جاری کیے۔ انہوں نے کہا کہ اوورسیز پاکستانیوں کی سہولت کیلئے ارجنٹ پاسپورٹ اب سات روز جبکہ نارمل پاسپورٹ تیس روز میں جاری ہوں گے، اس حوالے سے اے ایس پی شہر بانو کی سربراہی میں مانیٹرنگ سیل بھی قائم کر دیا گیا ہے، بیرون ملک مقیم پاکستانیوں کو متعین مدت میں پاسپورٹ جاری ہوں گے۔وفاقی وزیرداخلہ محسن نقوی نے سفارتخانے کے افسران کو محنت اور پروفیشنل اپروچ کے ساتھ فرائض کی ادائیگی کی تلقین کی۔ بعد ازاں وزیر داخلہ اور وفاقی وزیر برائے اوورسیز پاکستانیز نے وزیٹرز بک میں اپنے تاثرات درج کیے۔
