لاہور پولیس کے عشرہ محرم الحرام کے حوالے سے مربوط سکیورٹی پلان پر عملدرآمد کا آغاز کر دیا گیا

لاہور پاکستان(نمائندہ وائس آف جرمنی): لاہور پولیس کے عشرہ محرم الحرام کے حوالے سے مربوط سکیورٹی پلان پر عملدرآمد کا آغاز کر دیا گیا ہے۔عشرہ محرم کے دوران 11ہزار سے زائد پولیس افسران واہلکار سکیورٹی ڈیوٹی پرتعینات ہوں گے۔
یہ بات ترجمان لاہور پولیس نے آج یہاں جاری اپنے بیان میں کہی۔ترجمان نے بتایا کہ لاہور میں کیٹگری اے کی 457، کیٹگری بی کی2610اور کیٹگری سی کی801مجالس منعقد ہوں گی۔ لاہور میں کیٹگری اے کے17،کیٹگری بی کے74اور کیٹگری سی کے03لائسنسی جلوس نکالے جائیں گے۔اسی طرح کیٹگری اے کے87،کیٹگری بی کے234اور کیٹگری سی کے43غیر لائسنسی جلوس بھی نکلیں گے۔
سی سی پی او لاہور نے کہا کہ محرم الحرام کی مجالس اور جلوسوں کو فول پروف سکیورٹی فراہم کی جائے گی۔انہوں نے کہا کہ صوبائی دارالحکومت میں ماتمی جلوسوں اور مجالس کے ہاٹ سپاٹس میں سکیورٹی کے خصوصی انتظامات کئے جائیں گے۔انہوں نے اے کیٹگری جلوسوں اور مجالس کی سکیورٹی چیکنگ کیلئے سپروائزری افسران کو فیلڈ میں موجود رہنے کی ہدایات دیتے ہوئے کہا کہ محرم الحرام کے روٹس کی سکیورٹی کیمروں سے لمحہ بہ لمحہ نگرانی کی جائے گی۔بلال صدیق کمیانہ نے کہا کہ ماتمی جلوسوں و مجالس کے سکیورٹی ایس او پیزپرمن و عن عملدرآمدیقینی بنایا جائے گا۔انہوں نے بتایا کہ ضلعی انتظامیہ کی معاونت سے متوقع بارش کے پیش ِنظر ماتمی جلوسوں کے روٹس پرپیچ ورک،روشنی کے انتظام اور بجلی کی لٹکتی تاریں ہٹانے سمیت دیگر اقدامات کئے جا رہے ہیں۔انہوں نے بتایا کہ خواتین عزاداروں کی سکیورٹی اور چیکنگ کیلئے لیڈی پولیس اہلکار تعینات ہوں گی۔
سی سی پی او نے کہا کہ حساس جلوسوں اور مجالس کی سکیورٹی کیلئے سی سی ٹی وی کیمرے، واک تھرو گیٹس اور میٹل ڈکٹیٹرز سمیت دیگر جدید آلات سے استفادہ کیا جارہا ہے۔انہوں نے سکیورٹی کے لئے سرچ اینڈ سویپ آپریشنزکا سلسلہ جاری رکھنے کی ہدایات دیتے ہوئے کہا کہ پولیس افسران علما کرام، منتظمین اور مجالس و جلوس لائسنس ہولڈرز سے مسلسل رابطے میں رہیں۔ انہوں نے مزید کہا کہ محرم جلوسوں اور مجالس کے پر امن انعقاد کے ساتھ ساتھ ٹریفک کی روانی برقرار رکھنے کیلئے جامع حکمت عملی کے تحت انتظامات کئے جائیں گے۔