صدر مملکت اور وزیر اعظم پاکستان نے بنوں کینٹ میں دہشت گردی کے واقعے کی پُر زور مذمت کرتے ہوئے اس واقعے میں دفاع وطن پر جان نچھاور کرنے والے جوانوں کو بھرپور خراج عقیدت پیش کیا ہے۔
اپنے الگ الگ بیانات میں دونوں رہنماؤں کا کہنا تھا ’’کہ ہمارے جوانوں نے بروقت کارروائی کر کے قوم کو بڑے نقصان سے بچا لیا، پوری قوم کو اپنے بہادر جوانوں کی قربانی پر فخر ہے۔‘‘
صدر آصف علی زرداری نے بنوں کینٹ میں دہشت گردی کی کارروائی کو ناکام بنانے پر سکیورٹی فورسز کو خراج تحسین پیش کرتے ہوئے کہا کہ دہشت گرد عناصر کا جڑ سے خاتمہ کیا جائے گا۔
دریں اثنا اپنے ایک بیان میں وزیراعظم شہباز شریف نے بھی بنوں چھاؤنی پر دہشت گردوں کا حملہ ناکام بنانے پر سکیورٹی فورسز کو خراج تحسین پیش کیا ہے۔
وزیراعظم شہباز شریف نے بیان میں بنوں چھاؤنی پرحملے کی مذمت کرتے ہوئے حملے میں شہید ہونے والے پاک فوج اور فرنٹئیر کانسٹیبلری کے جوانوں نے کو خراج عقیدت پیش کیا اور ان کے درجات کی بلندی کے لیے دعا کی۔
وزیراعظم کا شہداء کے خاندانوں سے اظہار تعزیت کرتے ہوئے کہا کہ دہشت گردی کے خلاف پاک فوج اور دیگر سکیورٹی فورسز کی قربانیاں لازوال ہیں۔ پوری قوم دہشت گردی کے خلاف جنگ میں سکیورٹی فورسز کے ساتھ کھڑی ہے۔
انہوں نے حملے میں کام آنے والے سکیورٹی فورسز کے بہادر اور جری جوانوں کو سلام پیش کرتے ہوئے دہشت گردی کے عفریت کو مکمل ختم کرنے کے لئے حکومتی عزم کا اعادہ کیا۔
واضح رہے کہ بنوں چھاؤنی پر خودکش حملے میں پاک فوج کے آٹھ جوان جاں بحق ہو گئے جب کہ جوابی کارروائی میں 10 دہشت گرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق 15 جولائی کی صبح 10 دہشت گردوں کے ایک گروہ نے بنوں چھاوٴنی پر حملہ کیا اور چھاوٴنی میں داخل ہونے کی کوشش کی، جسے سکیورٹی فورسز کے اہلکاروں نے ناکام بنا دیا۔
حملے کے دوران دہشت گردوں نے بارود سے بھری گاڑی چھاؤنی کی دیوار سے ٹکرا دی، اس خودکش دھماکے کے نتیجے میں دیوار کا ایک حصہ گر گیا اور ملحقہ انفرا اسٹرکچر کو نقصان پہنچا۔
بنوں چھاؤنی پر دہشت گرد حملے میں جاں بحق ہونے والوں میں پاک فوج کے نائب صوبیدار محمد شہزاد، حوالدار ظل حسین، حوالدار شہزاد احمد، سپاہی اشفاق حسین خان، سپاہی سبحان مجید، سپاہی امتیاز خان، سپاہی ارسلان اسلم اور فرنٹئیر کانسٹیبلری کے لانس نائیک سبز علی شامل ہیں۔
