امریکی شاپنگ سینٹر میں آتش زدگی، 500 سے زائد جانور ہلاک
زیادہ تر جانوروں اور پرندوں کا دم گھٹ گیا، آتش زدگی کی وجہ کی تحقیقات جاری
(مدثر احمد-امریکا): حکام نے بتایا کہ جمعے کی صبح ڈیلاس کے ایک شاپنگ سینٹر میں آتش زدگی سے 500 سے زائد جانور ہلاک ہو گئے جن میں سے زیادہ تر چھوٹے پرندے تھے۔
ڈیلاس فائر ریسکیو کے ترجمان جیسن ایونز نے ایک بیان میں کہا کہ شمال مغربی ڈیلاس میں پلازہ لیٹینا میں پالتو جانوروں کی دکان میں موجود 579 جانور دھوئیں کے باعث دم گھٹنے سے مر گئے۔
ایونز نے کہا، "اگرچہ ڈی ایف آر کے اہلکاروں نے بچاؤ کی کوشش کی لیکن بدقسمتی سے دکان میں موجود تمام جانور دھوئیں کے باعث دم توڑ گئے۔”
آگ لگنے سے کوئی شخص زخمی نہیں ہوا۔ ایونز نے کہا کہ بڑے اور ایک منزلہ شاپنگ سینٹر کے ڈھانچے کو شدید نقصان پہنچا جس میں جزوی طور پر منہدم چھت بھی شامل تھی۔
شاپنگ سینٹر میں متعدد چھوٹے کاروبار کیے جاتے ہیں اور اس کے فیس بک پیج پر بیان کیا گیا ہے، "ایک ایسی جگہ جہاں لوگ کھانے کے لیے جا سکتے ہیں اور ہر طرح کی لاطینی اشیاء اور خدمات حاصل کر سکتے ہیں۔” صفحہ پر ہسپانوی زبان میں ایک پوسٹ میں وہاں کام کرنے والے خاندانوں کے لیے دعاؤں کا کہا گیا۔
ایونز نے کہا، آتش زدگی کی وجہ کا فوری طور پر تعین نہیں ہو سکا اور اس کی تحقیقات جاری ہیں۔
