پاک بھارت کشیدگی پر اقوام متحدہ کے سربراہ کا اہم بیان سامنے آگیا
دونوں حکومتوں سے اپیل کی کہ وہ "زیادہ سے زیادہ تحمل سے کام لیں اور کسی بھی طرح کی کشیدگی سے گریز کریں
(مدثر احمد-امریکا):اقوام متحدہ کے سیکرٹری جنرل انتونیو گوٹیرس نے مقبوضہ کشمیر میں گزشتہ ہفتے ہونے والے مسلح حملے کے بعد بھارت اور پاکستان کے درمیان بڑھتی ہوئی کشیدگی پر اپنی گہری تشویش کا اظہار کرتے ہوئے دونوں ممالک کے لیے قابل قبول کسی بھی ایسے اقدام کی حمایت کا اعلان کیا جو کشیدگی میں کمی اور مکالمے کی بحالی کو فروغ دے۔
سیکرٹری جنرل نے اپنے موقف میں واضح کیا کہ "وہ اس پختہ یقین کی تصدیق کرتے ہیں کہ انتہائی پیچیدہ مسائل بھی معنی خیز اور تعمیری مکالمے کے ذریعے پرامن طریقے سے حل کیے جا سکتے ہیں۔”
فرحان حق نے کہا، "وہ دونوں فریقوں کے لیے قابل قبول کسی بھی ایسے اقدام کی حمایت کے لیے تیار ہیں جو کشیدگی میں کمی اور بات چیت کو دوبارہ شروع کرنے میں معاون ہو۔”
میڈیا رپورٹس کے مطابق، پہلگام کے قریب ہونے والے حملے میں 26 افراد ہلاک ہوئے تھے۔ ڈپٹی ترجمان نے اپنے بیان میں کہا کہ اقوام متحدہ کے سربراہ نے 22 اپریل کے دہشت گرد حملے کے متاثرین کے اہل خانہ کے ساتھ یکجہتی کا اظہار کیا اور احتساب اور انصاف کی اہمیت پر زور دیا۔
انہوں نے دونوں حکومتوں سے اپیل کی کہ وہ "زیادہ سے زیادہ تحمل سے کام لیں اور کسی بھی طرح کی کشیدگی سے گریز کریں۔”
حملے کے بعد، بھارت نے پاکستان کے خلاف کئی اقدامات کا اعلان کیا، جن میں 1960 کے سندھ طاس معاہدے کو یکطرفہ طور پر معطل کرنا، دونوں ممالک کو جوڑنے والی سرحدی کراسنگ بند کرنا، اپنے ہاں پاکستانی سفارت کاروں کو نکالنا، اور بعض پاکستانی ویزا ہولڈرز کو 48 گھنٹوں کے اندر ملک چھوڑنے کا حکم شامل ہے۔
پاکستان، جس نے حملے میں ملوث ہونے کی سختی سے تردید کی ہے، نے جوابی کارروائی کرتے ہوئے ہندوستانی شہریوں کو دیے گئے تمام ویزا فوری طور پر معطل کر دیے، ساتھ ہی کچھ بھارتی سفارت کاروں کو ملک بدر کیا اور بھارتی پروازوں کے لیے اپنا فضائی راستہ بند کر دیا۔
تنازعہ کشمیر میں لائن آف کنٹرول (ایل او سی) کی نگرانی کرنے والی اقوام متحدہ کی فوجی مبصر گروپ (یو این ایم او جی آئی پی) کے کردار کے بارے میں فرحان حق نے کہا کہ اس گروپ کا "اس علاقے میں کوئی وجود نہیں ہے جہاں حملہ ہوا تھا۔” تاہم، انہوں نے کہا کہ یہ گروپ "1971 کی جنگ بندی کے معاہدے کے تحت لائن آف کنٹرول پر صورت حال کی نگرانی اور اس کی پابندی یقینی بنانے کے اپنے فرائض جاری رکھے ہوئے ہے۔”
پاکستان یو این مبصرین کو ایل او سی کی نگرانی کی اجازت دیتا ہے، جبکہ بھارت اسے تسلیم نہیں کرتا۔ راولپنڈی میں قائم یہ گروپ تقریباً 44 فوجی مبصرین پر مشتمل ہے، جنہیں 75 سویلین عملے (25 بین الاقوامی اور 49 مقامی) کی معاونت حاصل ہے۔
