پنجاب کی بیٹی کا قوم کے شاہینوں کو سلام — وزیراعلیٰ مریم نواز شریف کا پاک فضائیہ کو زبردست خراجِ تحسین

(سید عاطف ندیم-پاکستان): وزیراعلیٰ پنجاب مریم نواز شریف نے پاک فضائیہ کی جانب سے دشمن کے پانچ جنگی طیارے مار گرانے پر مسلح افواج کو زبردست خراجِ تحسین پیش کیا ہے اور کہا ہے کہ قوم کو اپنے بہادر سپاہیوں اور پائلٹس پر فخر ہے۔
وزیراعلیٰ مریم نواز نے ایک خصوصی بیان میں کہا:
"بھارت کا غرور، تکبر اور جھوٹا پروپیگنڈہ آج فضاؤں میں جل کر راکھ ہو چکا ہے۔”
انہوں نے مزید کہا کہ "پاک فضائیہ نے دنیا پر واضح کر دیا ہے کہ پاکستان ایک پرامن ملک ضرور ہے، لیکن اپنے دفاع پر کبھی سمجھوتہ نہیں کرے گا۔”
"یہ صرف دفاع نہیں، تاریخ رقم ہوئی ہے” — مریم نواز شریف
وزیراعلیٰ نے پاک فضائیہ کی جراتمندانہ کارروائی کو محض عسکری دفاع نہیں بلکہ تاریخی کامیابی قرار دیا۔ ان کا کہنا تھا کہ:
"یہ صرف ایک دفاعی اقدام نہیں بلکہ پاکستانی افواج نے آج تاریخ رقم کر دی ہے۔”
انہوں نے کہا کہ پاکستان نے دنیا کو یہ پیغام دیا ہے کہ:
"یہ پاکستان ہے، اسے آزمانے والے ہمیشہ پچھتاتے ہیں۔”
قوم کا جذبہ، افواج پر اعتماد
مریم نواز شریف نے کہا کہ پوری قوم اپنی افواج کے شانہ بشانہ کھڑی ہے، اور خاص طور پر پنجاب کی بیٹی ہونے کے ناتے وہ قوم کے شاہینوں کو سلام پیش کرتی ہیں۔
"ہمیں اپنے پائلٹس پر، اپنے سپاہیوں پر فخر ہے جو وطن کی سرحدوں کے محافظ ہیں۔”
انہوں نے یہ بھی کہا کہ دشمن کو ہر محاذ پر شکست دینے کے لیے پاکستان متحد ہے اور کسی بھی جارحیت کا منہ توڑ جواب دینے کے لیے تیار ہے۔
پس منظر:
یہ بیان ایسے وقت پر آیا ہے جب پاک فضائیہ نے دشمن کے پانچ جنگی طیاروں کو مار گرایا، جن میں تین رافیل، ایک مگ-29، اور ایک SU-30 شامل ہیں، جبکہ ایک ڈرون بھی تباہ کیا گیا۔ اس کامیاب دفاعی کارروائی نے خطے میں پاکستان کی عسکری برتری کو ایک بار پھر ثابت کیا ہے۔