مون سون کے دوران ہنگامی صورتحال سے نمٹنے کے لیئے آپریشنل اسٹاف کو ہائی الرٹ کردیا گیا۔

لاہور پاکستان(نمائندہ وائس آف جرمنی):‌لاہور الیکٹرک سپلائی کمپنی (لیسکو)کی جانب سے مون سون کے دوران بجلی کی فراہمی کے لیئے خصوصی اقدامات ترتیب دے دیئے گئے ہیں تاکہ مون سون کے د وران لیسکو صارفین کو بجلی سے متعلق دشواری کا سامنا نہ کرنا پڑے۔لیسکو کی جانب سے ایکسئین پی ڈی سی کو فوکل پرسن نامزد کیا گیا۔ چیف ایگزیکٹو لیسکوانجینئر شاہد حیدر کی خصوصی ہدایات کی روشنی میں لیسکو کے سرکلز اور سب ڈویژنز میں تمام افسران اور عملہ ہائی الرٹ رہیگا۔ بارش اور طوفان کی صورتحال میں تمام ایس ایز، ایکسیئنز اور ایس ڈی اوز کو اپنے اپنے دفاتر میں الرٹ رہنے کے احکامات جاری کیئے گئے ہیں جبکہ لائن سپر وائزرز اور لائن اسٹاف بھی ڈیوٹی پر حاضر رہے گا۔ایمرجنسی صورتحال سے نمٹنے کے لئے افسران تمام سب ڈویژنز میں اضافی ٹرانسفارمرز، ٹرالیوں کی موجودگی کو یقینی بنائیں۔تمام آپریشن ایس ایز کو ہدایات جاری کی ہیں کہ کسی بھی اوقات میں اسٹور سے سامان لینے کو آسان بنایا جائے۔چیف انجینئر میٹریل مینجمنٹ کو ہدایت کی گئی کے تمام اسٹورز میں اسٹاف کی موجودگی کو 24گھنٹے یقینی بنایا جائے۔کنسٹرکشن اسٹاف کو بھی ایمرجنسی کی صورت میں الرٹ رہنے کی ہدایات کی گئی ہے۔سیفٹی کو مدِنظر رکھتے ہوئے ہدایات کی گئی کہ سیفٹی سے متعلق اشتہارات لگوائے جائیں اور الیکٹرونک میڈیا پر بھی چلائے جائیں دوسری جانب لائن اسٹاف کو بھی ہدایات دی گئی ہیں کہ تمام لائن اسٹاف اپنی ٹی اینڈ پی مکمل رکھے گا اور کام کے دوران سیفٹی کا خاص خیال رکھا جائے۔فیلڈ آپریشن کی گاڑیاں دفاتر میں ہمہ وقت تیار کھڑی ہوں۔ خراب موسم کی صورت میں ایس ای (GSO)کی ہنگامی ٹیموں SS&Tنارتھ اور ساؤتھ کو ڈویژنل دفاتر میں الرٹ ہنے کی ہدایات جاری کی گئی ہیں۔تمام ایس ایز،ایکسئین اور ایس ڈی اوز اپنے آفیشلز نمبر کو ایکٹو رکھیں گے جبکہ پی ڈی (GSC)اور پی ڈی کنسٹرکشن کی ٹیموں کو دفاتر میں موجود رہنے کی ہدایات جاری کر دی گئی ہیں۔ملک میں سیلاب کی ممکنہ صورتحال کے پیشِ نظر امدادی سرگرمیوں کی نگرانی اور کنٹرول کے لئے ایس ڈی او آپریشن کو مقامی انتظامیہ کے ساتھ رابطے میں رہنے کی ہدایت بھی کی گئی ہے۔ تمام صارفین سے اپیل ہے کہ وہ مون سون میں کسی بھی ناگہانی صورتحال میں اپنے علاقے کی شکایات دفاتر کے علاوہ مندرجہ ذیل نمبروں پر بھی رابطہ کر سکتے ہیں۔042-99205461، 042-99205464، 0320-0520888۔ اس کے علاوہ لیسکو کی ہیلپ لائن111-000-118 پر بھی رابطہ کر سکتے ہیں۔