سپریم کورٹ نے کوئٹہ میں وکیل کے قتل کے مقدمے میں تحریک انصاف کے چیئرمین عمران خان کو آئندہ سماعت تک گرفتار نہ کرنے کی ہدایت دیتے ہوئے نو اگست کو دوبارہ طلب کر لیا ہے۔
پیر کو سپریم کورٹ میں کوئٹہ میں وکیل کے قتل کے مقدمے میں نامزدگی کے خلاف دائر درخواست پر سماعت ہوئی۔
کوئٹہ میں وکیل قتل کیس، ’عمران خان خود سپریم کورٹ میں پیش ہوں‘
جسٹس یحییٰ آفریدی کی سربراہی میں تین رکنی بنچ نے درخواست پر سماعت کی۔
ایڈووکیٹ جنرل بلوچستان نے موقف اپنایا کہ عمران خان کو کہیں وہ تفتیشی افسر کے سامنے پیش ہوں۔
جس پر عدالت نے استفسار کیا کہ ’کیا چیئرمین پی ٹی آئی آپ کو تفتیش کے لیے درکار ہیں؟ کس بنیاد پر آپ چیئرمین پی ٹی آئی کو شامل تفتیش کرنا چاہتے ہیں؟‘
ایڈووکیٹ جنرل بلوچستان نے عدالت کو بتایا کہ ایف آئی آر کے مطابق عمران خان کو شاملِ تفتیش کرنا چاہتے ہیں۔
عدالت نے سابق ویزراعظم عمران خان کو نو اگست تک ریلیف دیتے ہوئے کو آئندہ سماعت پر پیش ہونے کا حکم دے دیا۔
عدالت نے بلوچستان حکومت کی عمران خان کو شاملِ تفتیش ہونے کا حکم دینے کی استدعا مسترد کر دی۔
