لاہور پاکستان(نمائندہ وائس آف جرمنی):رہنما پاکستان تحریک انصاف فیاض الحسن چوہان نے سندھ کے بلدیاتی انتخابات میں بدترین دھاندلی پر اہم بیان دیتے ہوئے کہا کہ سندھ کے بلدیاتی الیکشنوں میں دھاندلی جیت گئ اور حقیقی ووٹرز ہار گئے۔ دھاندلی کے چکر میں بلدیاتی الیکشنز کے نتائج بھی 28 گھنٹوں سے زائد تاخیر کا شکار ہوئے۔ انہوں نے کہا کہ پی ٹی آئی کو دھاندلی میں لپٹی شکست دینے کے لئے سرکاری وسائل کا بے دریغ استعمال ہوا۔سندھ سرکار کی سر پرستی میں جعلی ووٹ ڈالے گئے اور جعلی ٹھپے لگائے گئے۔ای وی ایم مشین کا استعمال رکوانے کی یہی وجہ تھی جو کراچی میں دھاندلی کی صورت میں نظر آئی۔ عمران خان نے اس دھاندلی زدہ نظام سے لڑتے ہوئے الیکٹرانک ووٹنگ مشینیں لانے کا فیصلہ کیا تھا مگر پس پردہ کرداروں نے بند کمروں میں بیٹھ کر فیصلہ کیا کہ الیکٹرانک ووٹنگ کا نظام پاکستان کے ووٹنگ سسٹم کا حصہ نہیں ہونا چاہئے۔ عمران خان اور الیکٹرانک ووٹنگ کا نظام پاکستان کی بقا کے لئے نا گزیر ہے۔ فیاض الحسن چوہان کا کہنا تھا کہ جن عناصر نے پنجاب اور اسلام آباد کے الیکشنز ملتوی کروائے انہوں نے سندھ میں پی ٹی آئی کو کمزور کرنے کی کوشش کی۔ یہ لوگ جتنے مرضی جتن کر لیں پی ٹی آئی کا کچھ نہیں بگاڑ سکتے۔صاف اور شفاف الیکشنز کروانے میں الیکشن کمیشن بالکل ناکام رہا ہے۔ اس الیکشن کو شفاف الیکشن کہنے والے احمقوں کی جنت میں رہتے ہیں۔
