سی ایم اسپیشل گیمز 2025 لاہور میں شروع, 500 خصوصی کھلاڑی تین روزہ گیمز میں حصہ لے رہے ہیں.

ناصف اعوان.پاکستان،وائس آف جرمنی اردو نیوز کے ساتھ
پنجاب کی تاریخ کی پہلی سی ایم پنجاب اسپیشل گیمز 2025 پنجاب اسٹیڈیم میں رنگارنگ تقریب کے ساتھ شروع ہو گئیں۔ افتتاح صوبائی وزیر سوشل ویلفیئر و بیت المال سہیل شوکت بٹ نے کیا، جبکہ صوبائی وزیر کھیل و توانائی فیصل ایوب کھوکھر اور وزیر مواصلات و تعمیرات صہیب احمد بھرتھ نے خصوصی شرکت کی۔ صوبائی اراکین اسمبلی، پارلیمانی سیکریٹریز، معزز مہمانوں اور شہریوں کی بڑی تعداد نے بھی شرکت کی۔
گیمز میں پنجاب کے سرکاری و نجی اداروں کے علاوہ غیر سرکاری تنظیموں سے تعلق رکھنے والے تقریباً 500 خصوصی کھلاڑی 9 مختلف کھیلوں میں حصہ لے رہے ہیں۔ خصوصی کھلاڑیوں نے مارچ پاسٹ میں منفرد اور شاندار انداز میں شرکت کی۔ تقریب کا آغاز تلاوتِ قرآن پاک، نعت رسول مقبول ﷺ اور قومی ترانے سے ہوا۔ صوبائی وزیر سوشل ویلفیئر سہیل شوکت بٹ نے ویلکم ریمارکس پیش کیے اور گیمز کا باضابطہ آغاز کیا۔
صوبائی وزیر سوشل ویلفیئر سہیل شوکت بٹ نے بتایا کہ پنجاب میں افرادِ باہم معذوری میں 18 ہزار کے قریب معاون آلات، بشمول وہیل چیئرز، تقسیم کیے جا چکے ہیں۔ ایک لاکھ خصوصی افراد کو ہمت کارڈ کے ذریعے سہ ماہی 10,500 روپے وظیفہ فراہم کیا جا رہا ہے۔ وزیر اعلیٰ پنجاب نے سپیشل ایجوکیشن کے 40 ہزار بچوں کو بھی ہمت کارڈ دینے کا اعلان کیا ہے۔ انہوں نے کہا کہ خصوصی افراد معاشرے کا اہم حصہ ہیں، ماضی میں انہیں نظرانداز کیا گیا، مگر موجودہ حکومت انہیں برابری کے مواقع فراہم کر رہی ہے۔
صوبائی وزیر کھیل و توانائی فیصل ایوب کھوکھر نے کہا کہ گزشتہ ڈیڑھ سال میں محکمہ سوشل ویلفیئر نے عوامی فلاح کے تاریخی پروگرام شروع کیے ہیں۔ معاشرے کے نادار طبقے کی بحالی حکومت پنجاب کی ترجیح ہے۔ انہوں نے کہا کہ خصوصی ایتھلیٹس انتہائی باصلاحیت ہیں اور محکمہ کھیل ان کی حوصلہ افزائی کے لیے مکمل مالی و انتظامی تعاون فراہم کرے گا۔
صوبائی وزیر مواصلات و تعمیرات صہیب احمد بھرتھ نے کہا کہ خصوصی بچے ہمارے دل کے بہت قریب ہیں اور وزیر اعلیٰ مریم نواز اور ان کی پوری ٹیم انہیں سلام پیش کرتی ہے۔ خصوصی کھلاڑی بے شمار صلاحیتوں کے مالک ہیں اور ان کے والدین و اساتذہ مبارکباد کے مستحق ہیں۔ انہوں نے بتایا کہ وزیراعلیٰ پنجاب نے خصوصی افراد کے لیے پہلا اسٹیٹ آف دی آرٹ آٹزم سکول قائم کیا ہے۔
تقریب میں صوبائی وزراء فیصل ایوب کھوکھر اور صہیب بھرتھ کو محکمہ سوشل ویلفیئر کی جانب سے سووینئر پیش کیے گئے۔ ٹارچ بیئررز کے مارچ نے اسٹیڈیم کا ماحول مزید گرم کر دیا۔ ایتھلیٹس نے افتتاحی تقریب میں حلف اٹھایا جبکہ علامہ اقبالؒ کا کلام، ملی نغمے، ثقافتی شو اور لائیو میوزیکل پرفارمنس نے تقریب کی خوبصورتی کو دوبالا کر دیا۔
پنجاب اسٹیڈیم میں تین روزہ مقابلوں کا باضابطہ آغاز ہو چکا ہے جن میں ایتھلیٹکس، بیڈمنٹن، ٹیبل ٹینس، فٹبال، باسکٹ بال، پینتھلون، ٹگ آف وار، والی بال اور بوکیا سمیت متعدد ایونٹس شامل ہیں۔ خصوصی کھلاڑیوں کا جوش و جذبہ دیدنی ہے۔