وفاقی وزیر داخلہ و نارکوٹکس کنٹرول محسن نقوی کا دورہ بلجیئم،بلجیئم کے ہم منصب برنارڈ کوائنٹن سے اہم ملاقات
پاکستان نے غیر قانونی امیگریشن کی روک تھام کے لیے سخت اور مؤثر اقدامات کیے ہیں۔ اقوامِ عالم کو غیر قانونی امیگریشن روکنے کے لیے مشترکہ حکمتِ عملی اور مربوط اقدامات پر عمل پیرا ہونے کی ضرورت ہے۔محسن نقوی
جواد احمد-جرمنی،وائس آف جرمنی اردو نیوز کے ساتھ
برسلز:وفاقی وزیر داخلہ و نارکوٹکس کنٹرول محسن نقوی کا دورہ بلجیئم، وفاقی وزیر داخلہ و نارکوٹکس کنٹرول محسن نقوی نے برسلز میں بلجیئم کے وزیر داخلہ برنارڈ کوائنٹن سے اہم ملاقات کی، جس میں باہمی دلچسپی کے امور اور غیر قانونی امیگریشن کی روک تھام کے لیے تعاون پر تفصیلی تبادلہ خیال کیا گیا۔
ملاقات میں امیگرنٹس کی سمگلنگ پر قابو پانے کے لیے دوطرفہ اشتراکِ عمل کو مزید مضبوط بنانے پر اتفاق کیا گیا۔دونوں وزرائے داخلہ کے درمیان انسدادِ دہشت گردی، انسدادِ منشیات اور پیرا ملٹری فورسز کی مشترکہ ٹریننگ سے متعلق تعاون بڑھانے پر بھی بات چیت ہوئی۔وفاقی وزیر داخلہ محسن نقوی نے اس موقع پر کہا کہ اقوامِ عالم کو غیر قانونی امیگریشن روکنے کے لیے مشترکہ حکمتِ عملی اور مربوط اقدامات پر عمل پیرا ہونے کی ضرورت ہے۔ انہوں نے کہا کہ پاکستان نے غیر قانونی امیگریشن کی روک تھام کے لیے سخت اور مؤثر اقدامات کیے ہیں۔بلجیئم کے وزیر داخلہ برنارڈ کوائنٹن نے انسدادِ دہشت گردی اور غیر قانونی امیگریشن کے حوالے سے پاکستان کی کاوشوں کو قابلِ تحسین قرار دیا اور کہا کہ پاکستان نے خطے اور عالمی برادری کے لیے ایک مثبت مثال قائم کی ہے۔ملاقات کے موقع پر برسلز میں تعینات پاکستانی سفارتکار اور بلجیئم کی وزارتِ داخلہ کے اعلیٰ حکام بھی موجود تھے۔
