سید عاطف ندیم-پاکستان،وائس آف جرمنی اردو نیوز،آئی ایس پی آر کے ساتھ
پاکستانی سکیورٹی فورسز نے خیبر پختونخوا کے مختلف اضلاع میں دو علیحدہ انٹیلی جنس بیسڈ آپریشنز کے دوران مجموعی طور پر 13 خوارج کو ہلاک کر دیا۔ پاک فوج کے ترجمان ادارے انٹر سروسز پبلک ریلیشنز (آئی ایس پی آر) نے اتوار کے روز جاری بیان میں ان کارروائیوں کی تفصیلات جاری کیں۔
آئی ایس پی آر کے مطابق 12 اور 13 دسمبر کی درمیانی شب سکیورٹی فورسز نے ضلع مہمند میں خفیہ معلومات کی بنیاد پر ایک مؤثر آپریشن کیا۔ آپریشن کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں سات خوارج مارے گئے۔ بیان میں کہا گیا کہ مارے جانے والے دہشت گرد علاقے میں سکیورٹی فورسز اور شہریوں کے خلاف دہشت گردانہ سرگرمیوں میں ملوث تھے۔
آئی ایس پی آر کے مطابق اسی نوعیت کا ایک اور انٹیلی جنس بیسڈ آپریشن ضلع بنوں میں کیا گیا، جہاں سکیورٹی فورسز نے خفیہ اطلاعات پر کارروائی کرتے ہوئے چھ خوارجیوں کو ہلاک کر دیا۔ بیان کے مطابق یہ عناصر بھی امن و امان کو نقصان پہنچانے اور ریاست مخالف سرگرمیوں میں ملوث تھے۔
کلیئرنس آپریشنز جاری
فوج کے ترجمان نے کہا کہ ان کارروائیوں کے بعد متعلقہ علاقوں میں کلیئرنس آپریشنز جاری ہیں تاکہ کسی بھی ممکنہ طور پر موجود دہشت گرد عناصر کا مکمل طور پر خاتمہ کیا جا سکے۔ سکیورٹی فورسز اس بات کو یقینی بنا رہی ہیں کہ علاقے کو ہر قسم کی دہشت گرد سرگرمیوں سے پاک کیا جائے۔
’عزمِ استحکام‘ کے تحت بھرپور مہم
آئی ایس پی آر کے بیان میں مزید کہا گیا کہ پاکستانی سکیورٹی فورسز اور قانون نافذ کرنے والے ادارے نیشنل ایکشن پلان کے تحت وفاقی ایپکس کمیٹی سے منظور شدہ وژن ’عزمِ استحکام‘ کے مطابق دہشت گردی کے خلاف بھرپور اور مسلسل مہم جاری رکھے ہوئے ہیں۔ اس وژن کا مقصد ملک میں امن و استحکام کو یقینی بنانا اور دہشت گردی کے مکمل خاتمے کے لیے تمام وسائل بروئے کار لانا ہے۔
غیر ملکی سرپرستی
بیان میں اس امر کی بھی نشاندہی کی گئی کہ یہ خوارج غیر ملکی، بالخصوص بھارتی سرپرستی میں سرگرم تھے اور پاکستان میں بدامنی پھیلانے کی کوششوں میں ملوث تھے۔ آئی ایس پی آر نے واضح کیا کہ غیر ملکی معاونت سے ہونے والی دہشت گردی کے ناسور کو ملک سے مکمل طور پر ختم کرنے تک سکیورٹی فورسز کی کارروائیاں پوری شدت اور رفتار کے ساتھ جاری رہیں گی۔
عزم کا اعادہ
آئی ایس پی آر نے اس عزم کا اعادہ کیا کہ پاکستان کی سکیورٹی فورسز قوم کے تعاون سے دہشت گردی کے مکمل خاتمے کے لیے پرعزم ہیں اور ملک کے امن، خودمختاری اور سالمیت پر کسی بھی قسم کا سمجھوتہ نہیں کیا جائے گا۔
