ہم قریب ہی رہیں گے، آبنائے ہرمز میں ازدحام کم کرنے میں مدد کریں گے : ٹرمپ

ٹرمپ نے سوشل میڈیا پر ایک پوسٹ کے ذریعے کہا کہ بہت سے مثبت اقدامات کیے جائیں گے اور خطیر رقم کمائی جائے گی، جبکہ ایران بھی اپنی تعمیرِ نو کا عمل شروع کر سکتا ہے۔

صدر ٹرمپ نے "ٹروتھ سوشل” پلیٹ فارم پر لکھا "عالمی امن کے لیے ایک عظیم دن! ایران اس کا خواہش مند ہے، وہ تنگ آ چکا ہے! اور باقی سب بھی! امریکہ آبنائے ہرمز میں ٹریفک کے ازدحام کو کم کرنے میں مدد کرے گا۔ بہت سی مثبت پیش رفت ہوں گی اور بہت سا پیسہ کمایا جائے گا۔”

امریکی صدر نے مزید کہا "ایران دوبارہ تعمیرِ نو کا عمل شروع کر سکتا ہے۔ ہم خطے کو ہر قسم کی رسد فراہم کریں گے اور اس بات کو یقینی بنانے کے لیے ہمہ وقت تیار رہیں گے کہ معاملات ٹھیک رہیں۔ مجھے اس کا پورا یقین ہے۔ جیسا کہ ہم امریکہ میں دیکھ رہے ہیں، یہ مشرقِ وسطیٰ کا سنہری دور ہو سکتا ہے!”

امریکی صدر ڈونلڈ ٹرمپ نے ایران کے ساتھ دو ہفتوں کی جنگ بندی کی منظوری دی ہے۔ یہ منظوری تہران کو دی گئی اس مہلت کے ختم ہونے سے دو گھنٹے قبل دی گئی جس میں آبنائے ہرمز کو دوبارہ کھولنے یا بصورتِ دیگر ایران کے شہری بنیادی ڈھانچے پر وسیع پیمانے پر حملوں سے خبردار کیا گیا تھا۔

سوشل میڈیا پر ٹرمپ کا یہ اعلان ان کے اس دن کے ابتدائی موقف سے اچانک تبدیلی کو ظاہر کرتا ہے، جب انہوں نے متنبہ کیا تھا کہ اگر مطالبات تسلیم نہ کیے گئے تو "آج رات ایک پوری تہذیب فنا ہو جائے گی”۔

پاکستانی وزیر اعظم شہباز شریف نے جنہوں نے اس جنگ بندی کے لیے ثالثی میں مدد کی، سوشل میڈیا پلیٹ فارم "ایکس” پر ایک پوسٹ میں بتایا کہ انہوں نے ایرانی اور امریکی وفود کو جمعہ کے روز اسلام آباد میں ملاقات کی دعوت دی ہے۔