پنجاب سی این ایف کی بڑی کارروائیاں: 10 روز میں 52 انٹیلی جنس بیسڈ آپریشنز، 108 کلو منشیات برآمد، 53 ملزمان گرفتار
اگست 2025 میں ادارے کے آپریشنل ہونے کے بعد سے اب تک مجموعی طور پر 15.8 ٹن منشیات برآمد کی جا چکی ہے، جن کی مالیت کا تخمینہ 2.132 ارب روپے سے زائد ہے
سید عاطف ندیم-پاکستان،وائس آف جرمنی اردو نیوز کے ساتھ
پنجاب کاؤنٹر نارکوٹکس فورس (CNF)ے صوبے بھر میں منشیات کے خلاف اپنی کارروائیاں مزید تیز کرتے ہوئے گزشتہ 10 روز کے دوران 52 کامیاب انٹیلی جنس بیسڈ آپریشنز کیے، جن کے نتیجے میں بڑے پیمانے پر منشیات برآمد اور درجنوں ملزمان کو گرفتار کر لیا گیا۔
ترجمان سی این ایف کے مطابق یہ کارروائیاں لاہور، سرگودھا، ڈی جی خان، ملتان، راولپنڈی، فیصل آباد، گوجرانوالہ اور بہاولپور سمیت مختلف اضلاع میں کی گئیں۔ ان کارروائیوں کے دوران مجموعی طور پر 53 منشیات فروشوں کو گرفتار کیا گیا، جن میں خواتین ملزمان بھی شامل ہیں، جو اس مکروہ دھندے میں ملوث تھیں۔
حکام کے مطابق کارروائیوں کے دوران 108 کلوگرام سے زائد مختلف اقسام کی منشیات برآمد کی گئی، جن کی مجموعی مالیت تقریباً 2 کروڑ روپے لگائی گئی ہے۔ برآمد شدہ منشیات میں 50 کلوگرام چرس، 1 کلوگرام ویڈ، 25 کلوگرام افیون، 3 کلوگرام آئس، 27 کلوگرام کینابس، 2 کلوگرام ہیروئن اور 1200 ایکسٹیسی گولیاں شامل ہیں۔ یہ منشیات صوبے کے مختلف علاقوں میں سپلائی کے لیے تیار کی جا رہی تھیں۔
مزید برآں، سی این ایف نے ان کارروائیوں کے دوران ملزمان کے قبضے سے 19 مختلف اقسام کے غیر قانونی ہتھیار بھی برآمد کیے، جن میں 10 پستول، 5 سب مشین گنز (SMGs) اور 4 رائفلز شامل ہیں۔ حکام کا کہنا ہے کہ اسلحے کی موجودگی اس بات کی نشاندہی کرتی ہے کہ منشیات فروش نیٹ ورک نہ صرف منظم ہیں بلکہ مسلح بھی ہیں، جو قانون نافذ کرنے والے اداروں کے لیے ایک بڑا چیلنج ہیں۔
سی این ایف کے ترجمان نے بتایا کہ اگست 2025 میں ادارے کے آپریشنل ہونے کے بعد سے اب تک مجموعی طور پر 15.8 ٹن منشیات برآمد کی جا چکی ہے، جن کی مالیت کا تخمینہ 2.132 ارب روپے سے زائد ہے۔ یہ اعداد و شمار اس بات کا ثبوت ہیں کہ ادارہ صوبے میں منشیات کے خاتمے کے لیے بھرپور اور مؤثر اقدامات کر رہا ہے۔
حکام نے اس عزم کا اعادہ کیا کہ پنجاب بھر میں منشیات فروشوں اور ان کے نیٹ ورکس کے خلاف بلا امتیاز کارروائیاں جاری رکھی جائیں گی۔ انہوں نے عوام سے بھی اپیل کی کہ وہ منشیات کے خلاف اس مہم میں قانون نافذ کرنے والے اداروں کا ساتھ دیں اور کسی بھی مشکوک سرگرمی کی فوری اطلاع متعلقہ حکام کو دیں۔
ماہرین کے مطابق اس طرح کی مسلسل اور مربوط کارروائیاں نہ صرف منشیات کی ترسیل کو کم کرنے میں مدد دیتی ہیں بلکہ معاشرے میں اس کے بڑھتے ہوئے رجحان کو روکنے میں بھی اہم کردار ادا کرتی ہیں۔ پنجاب سی این ایف کی حالیہ کامیابیاں اس بات کی عکاسی کرتی ہیں کہ اگر مربوط حکمت عملی اور انٹیلی جنس بیسڈ آپریشنز جاری رکھے جائیں تو منشیات جیسے ناسور پر قابو پایا جا سکتا ہے۔
