وزیراعلیٰ پنجاب مریم نواز شریف کے وژن کی روشنی میں واسا لاہور کی انسدادِ سموگ سرگرمیوں میں تیزی، صوبائی وزیر ہاؤسنگ بلال یاسین کی مختلف علاقوں کا دورہ

سید عاطف ندیم-پاکستان،وائس آف جرمنی اردو نیوز کے ساتھ
لاہور: وزیراعلیٰ پنجاب مریم نواز شریف کے واضح وژن اور ہدایات کی روشنی میں صوبائی حکومت نے سموگ کے خاتمے اور شہریوں کو صاف و شفاف ماحول کی فراہمی کے لیے عملی اقدامات تیز کر دیے ہیں۔ اسی سلسلے میں صوبائی وزیر ہاؤسنگ بلال یاسین نے ڈی جی واسا پنجاب طیب فرید اور ایم ڈی واسا لاہور غفران احمد کے ہمراہ لاہور شہر کے مختلف علاقوں کا دورہ کیا اور انسدادِ سموگ مہم کے تحت جاری سرگرمیوں کا تفصیلی جائزہ لیا۔
وزیر ہاؤسنگ نے غوث اعظم روڈ، مین بلیوارڈ فیصل ٹاؤن اور خیابانِ فردوسی جوہر ٹاؤن کے مختلف مقامات کا دورہ کیا، جہاں واسا لاہور کی جانب سے سڑکوں پر پانی کے چھڑکاؤ اور صفائی کے عمل کا مشاہدہ کیا گیا۔ اس موقع پر انہیں بریفنگ دی گئی کہ واسا لاہور روزانہ کی بنیاد پر شہر کی مختلف شاہراہوں پر گرد و غبار کے خاتمے کے لیے پانی کا چھڑکاؤ کر رہا ہے تاکہ سموگ کے اثرات میں خاطر خواہ کمی لائی جا سکے۔

ایم ڈی واسا غفران احمد نے اس موقع پر گفتگو کرتے ہوئے کہا کہ واسا لاہور اپنے تمام تر وسائل بروئے کار لا کر سموگ کے تدارک اور شہریوں کو بہتر ماحولیاتی سہولیات کی فراہمی کے لیے سرگرم عمل ہے۔ ان کا کہنا تھا کہ واسا کی ٹیمیں صبح اور شام کے اوقات میں مرکزی شاہراہوں، تعمیراتی مقامات اور گنجان آباد علاقوں میں باقاعدگی سے پانی کا چھڑکاؤ کر رہی ہیں تاکہ فضا میں معلق گرد و غبار کی مقدار کو کم کیا جا سکے۔
دورے کے دوران صوبائی وزیر ہاؤسنگ بلال یاسین نے متعلقہ حکام کو ہدایات جاری کیں کہ:تمام ترقیاتی منصوبوں کے اطراف میں باقاعدہ پانی کا چھڑکاؤ یقینی بنایا جائے۔
تعمیراتی ملبہ، مٹی اور گرد و غبار کے فوری خاتمے کے لیے خصوصی صفائی ٹیمیں تعینات کی جائیں۔
شہری علاقوں میں صفائی کے عمل کو مزید تیز کیا جائے۔
واسا، ایل ڈبلیو ایم سی اور ٹریفک پولیس کے درمیان مؤثر کوآرڈینیشن کو برقرار رکھا جائے۔
عوامی سطح پر آگاہی مہم چلائی جائے تاکہ شہری بھی اس مہم میں اپنا کردار ادا کر سکیں۔
صوبائی وزیر نے اپنے دورے کے دوران خیابانِ فردوسی جوہر ٹاؤن میں جاری ٹرنک سیوریج سسٹم کے منصوبے کا بھی جائزہ لیا اور ترقیاتی کاموں کی رفتار کو تیز کرنے کی ہدایت کی۔ انہوں نے موقع پر موجود افسران کو تاکید کی کہ مقررہ مدت میں معیاری کام کی تکمیل یقینی بنائی جائے تاکہ شہریوں کو درپیش مسائل کا فوری ازالہ ممکن ہو۔

اس موقع پر صوبائی وزیر بلال یاسین نے میڈیا سے گفتگو کرتے ہوئے کہا کہ وزیراعلیٰ پنجاب مریم نواز شریف کی قیادت میں صوبہ بھر میں انسدادِ سموگ کے لیے ایک مربوط اور جامع حکمتِ عملی اپنائی گئی ہے۔ لاہور کو سموگ فری شہر بنانے کے لیے تمام متعلقہ ادارے ہم آہنگی کے ساتھ کام کر رہے ہیں۔ حکومت پنجاب شہریوں کو صحت مند اور آلودگی سے پاک ماحول فراہم کرنے کے لیے ہر ممکن اقدامات جاری رکھے ہوئے ہے، اور مستقبل میں مزید مؤثر اقدامات متعارف کروائے جائیں گے۔

حکومتی عزم، عوامی شمولیت کی ضرورت
ماحولیاتی ماہرین کا کہنا ہے کہ سموگ ایک سنگین ماحولیاتی اور صحت کا مسئلہ ہے، جس کا حل صرف حکومتی اقدامات سے ممکن نہیں، بلکہ عوام کی بھرپور شمولیت اور شعور بیدار کرنے کی بھی اشد ضرورت ہے۔ واسا لاہور، ایل ڈبلیو ایم سی اور دیگر اداروں کی کوششیں قابلِ تحسین ہیں، تاہم پائیدار نتائج کے لیے شہریوں کو بھی صفائی، دھواں کم پیدا کرنے والے ذرائع کے استعمال اور غیر ضروری گاڑیوں کے استعمال میں کمی جیسے اقدامات کرنے ہوں گے۔