قائد اعظم ڈے اور کرسمس ڈے پر سیکورٹی پلان مرتب

لاہورپاکستان(نمائندہ وائس آف جرمنی): لاہور پولیس کی طرف سے قائدِ اعظم ڈے اور کرسمس تقریبات کو پُر امن بنانے کیلئے مربوط سکیورٹی پلان تشکیل دے دیا گیا۔ ڈی آئی جی آپریشنزسید علی ناصر رضوی کی ہدایت پر لاہور پولیس نے مسیحی رہنماؤں اور چرچزانتظامیہ کی مشاورت سے کرسمس کاسکیورٹی پلان مرتب کیا ہے۔سید علی ناصر رضوی نے تفصیلات سے آگاہ کرتے ہوئے بتایا کہ کرسمس اور قائد اعظم ڈے کے موقع پر6ڈویژنل ایس پیزکی سپرویژن میں 22سرکل افسران اور83 ایس ایچ اوز سمیت 5ہزار سے زائد پولیس افسرا ن اورجوان ڈیوٹی انجام دیں گے۔گرجا گھروں اورعبادت گذاروں کو تین درجاتی حصار پر مبنی فول پروف سکیورٹی فراہم کی جائے گی۔مسیحی برادری کو کرسمس کے موقع پر مکمل تحفظ فراہم کرنے کیلئے گرجا گھروں اور اہم مقامات کا سکیورٹی آڈٹ کیا جا چکا ہے۔ڈی آئی جی آپریشنز نے کہا کہ لاہور کے تمام622گرجا گھروں کو اے، بی،سی اور ڈی کیٹیگری میں تقسیم کیا گیا ہے۔کیٹیگری اے میں 59،بی84، سی 378 جبکہ ڈی کیٹیگری میں 101 گرجا گھر شامل ہیں۔حساس گرجا گھروں کے چھتوں پر سنائپرز تعینات کئے جائیں گے۔دعائیہ تقاریب میں شرکت کیلئے گرجاگھر آنے والے اشخاص کو مکمل شناخت اور چیکنگ کے بعد ہی داخلے کی اجازت ہو گی۔ پولیس افسران،گرجا گھر انتظامیہ واک تھرو گیٹس، میٹل ڈیٹیکٹرزکا استعمال یقینی بنائیں۔پارکنگ گرجا گھروں سے مناسب فاصلہ پر بنائی جائے گی۔ کرسمس بازاروں،تفریح گاہوں اور پارکوں کی سکیورٹی کیلئے اضافی نفری تعینات کی جائے گی۔سید علی ناصر رضوی نے کہا کہ قائداعظم ڈے کی مناسبت سے تمام ریلیز، سیمینارزکو بھرپور سکیورٹی فراہم کی جائے گی۔ 24 اور 25دسمبر کو شہر کے مختلف مقامات پر سپیشل پکٹس لگائی جائیں گی۔ ہوائی فائرنگ،آتش بازی،ون ویلنگ کرنے والوں کے خلاف کاروائی ہوگی۔ون ویلنگ کی روک تھام کیلئے ناکوں سمیت پٹرولنگ ٹیمیں متحرک رہیں گی۔ ڈولفن سکواڈ،پولیس ریسپانس یونٹ سمیت دیگر پٹرولنگ گاڑیوں کی متواتر گشت جاری رہے گی۔