تنبیہ کے باوجود 15 پر غیرمتعلقہ کالز کرنے والوں کے خلاف مقدمات درج ہوں گے

لاہور پاکستان(نمائندہ وائس آف جرمنی):‌ پنجاب سیف سٹیز اتھارٹی نے لاہور پولیس کے تعاون سے ون فائیو (15) ایمرجنسی ہیلپ لائن پر غیر متعلقہ کالرز کیخلاف کارروائی کا فیصلہ کرلیا ہے۔تفصیلات کے مطابق پنجاب سیف سٹیز اتھارٹی ہر ماہ 200 ٹاپ غیر متعلقہ کالرز کو تنبیہ کیلئے کال بیک کررہی ہے۔تنبیہ کے باوجود 15 پر غیرمتعلقہ کالز کرنے سے باز نہ آنے والوں کے خلاف مقدمات درج ہوں گے۔15ایمرجنسی نمبر پر روزانہ کی بنیاد پر 70 سے 80 ہزار کالزموصول ہوتی ہیں۔اس حوالے سے ایس پی اویس شفیق کاکہنا تھاکہ ایمرجنسی ہیلپ لائن پر ہر ماہ 6 سے 7 لاکھ غیر متعلقہ کالز کی جارہی ہیں۔غیر متعلقہ کالز کی وجہ سے ون فائیو (15) ایمرجنسی نمبر مسلسل مصروف رہتا ہے۔ ایمرجنسی نمبرکے ناجائز استعمال سے سنگین صورتحال میں پھنسے شہریوں کی امداد میں تاخیر ہوتی ہے۔ان کا مزید کہنا تھاکہ ون فائیو(15) ایمرجنسی ہیلپ لائن مصیبت میں مبتلا شہریوں کی سہولت کیلئے حکومت کی ایک فری سروس ہے۔شہریوں سے اپیل ہے ون فائیو (15) ایمرجنسی ہیلپ لائن پرغیر ضروری کالزسے اجتناب کریں۔