دریچے فلمز اور ظہیر الدین کی کرائم تھرلر فلم ’چکڑ‘ کا کراچی میں شاندار پریمیئر

کراچی، 20 دسمبر 2023: سسپنس، ڈرامے اور حقیقت پسندی سے بھرپور دریچے فلمز کی شاہکار ‘چکڑ’ کا کراچی میں ستاروں سے سجی شام میں شاندار پریمیئر منعقد ہوا۔ ظہیر الدین کی ہدایت کاری کا یہ پہلا شاہکار بلاشبہ سال 2023 میں لالی وڈ کی سب سے جاندار اور قابلِ ستائش کرائم تھرلر فلم ہے۔
پریمیئر کے موقع پر ناقدین اور آڈیئنس نے فلم کو قابل ستائش قرار دیا اور عثمان مختار، اشنا شاہ، فریال محمود، نوشین شاہ، سلیم معراج، علی شیخ، عدنان شاہ ٹیپو، ڈیبیو کاسٹ اور سپورٹنگ کاسٹ کی شاندار اداکاری کو دل کھول کر سراہا۔
ظہیر الدین نے پریمیئر میں شرکت کرنے پر فلم اور انٹرٹینمنٹ انڈسٹری کے لیے نیک تمناؤں کا اظہار کیا، اور چکڑ کے لیے ان کی محبت اور پذیرائی کا شکریہ ادا کیا۔
ظہیرالدین نے اپنے خیالات کا اظہار کرتے ہوئے کہا کہ، ” پہلی فلم ہونے کے ناطے ‘چکڑ’میرے دل میں ایک خاص مقام رکھتی ہے، اور مجھے یقین ہے کہ اس کا یہ مقام ہمیشہ برقرار رہے گا۔ میں فلم کا تمام کریڈٹ کاسٹ کو دوں گا جنہوں نے میرے نظریے اور سوچ کو سحر انگیز طریقے سے پیش کیا۔ مجھے یقین ہے کہ یہ فلم لوگوں کو ضرور پسند آئے گی ۔ انڈسٹری کے ساتھیوں کا مجموعی ردعمل دیکھ کر مجھے بے حد خوشی ہوئی ہے اور اب مجھے گرینڈ پبلک پریمیئر کا بے صبری سےانتظار ہے”۔
‘چکڑ’ میں حساس موضوعات اور حقیقی مناظر کی دلکش تصویر پیش کی گئی ہے ،جو مقامی فلمی انڈسٹری کےروشن مستقبل کی ضمانت ہے اور نوجوان اداکاروں کو اپنے فن کا مظاہر ہ کرنے کے لیے ایک پلیٹ فارم فراہم کرتی ہے ۔”
‘چکڑ’22 دسمبر 2023 سے پاکستان بھر کے سینما گھروں کی زینت بنے گی جس کے لیے ایڈوانس بکنگ جاری ہے۔