15کی کالز پرپولیس کی بروقت کارروائیوں سے کرائم ریٹ میں واضع کمی آئی ہے

لاہور پاکستان(نمائندہ وائس آف جرمنی): کیپٹل سٹی پولیس آفیسر لاہور بلال صدیق کمیانہ کی زیر صدارت سی سی پی او آفس میں کینٹ اورماڈل ٹاؤن ڈویژنز کی کارکردگی کا جائزہ اجلاس منعقد ہوا۔ سی سی پی او لاہور نے دونوں ڈویژنز کی کارکردگی کا تفصیلی جائزہ لیا۔سی سی پی او بلال صدیق کمیانہ نے اجلاس سے خطاب کرتے ہوئے کہا کہ 15کی کالز پرپولیس کی بروقت کارروائیوں کے نتیجے میں کرائم ریٹ میں واضع کمی آئی ہے۔انہوں نے کہا کہ موثر پولیسنگ سے پراپرٹی کرائم، ڈکیتی، چوری اورنقب زنی کی وارداتوں میں کمی واقع ہوئی ہے۔ انہوں نے کہا کہ جرائم میں کمی کا رحجان خوش آئند ہے، کرائم کا گراف مزید نیچے لائیں گے۔
سی سی پی او لاہورنے اجلاس کے دوران پینڈنگ روڈ سرٹیفکیٹس اور زیر ِ تفتیش مقدمات کو جلد سے جلد یکسو کرنے کی ہدایت کرتے ہوئے منشیات فروشوں کے خلاف جاری کریک ڈاؤن کو مزید تیز کرنے کا حکم دیا۔انہوں نے کہا کہ ایس ایچ اوز اے وی ایل ایس کی معاونت سے موٹر سائیکل چوری کی روک تھام کو یقینی بنائیں۔بلال صدیق کمیانہ نے عادی چوروں، ڈاکوؤں اوراشتہاریوں کے خلاف مربوط کریک ڈاؤن کا حکم دیتے ہوئے اشتہاریوں کی گرفتاری، شناخت پریڈ اور ریکوری امور مزید بہتر بنانے کی ہدایات جاری کیں۔سی سی پی او لاہور نے کہا کہ انوسٹی گیشن ونگ مقدمات کو میرٹ پر یکسو کرکے مظلوم کو انصاف کی فراہمی اور چالان کی بروقت تکمیل یقینی بنائے۔انہوں نے کہا کہ کوالٹی انویسٹی گیشن حصول ِانصاف کا بنیادی ذریعہ ہے اورمظلوم کی داد رسی کوالٹی انوسٹی گیشن سے ہی ممکن ہے۔بلال صدیق کمیانہ نے کہا کہ غیر قانونی حراست،اختیارات سے تجاوز اور شہریوں سے نارواسلوک کسی صورت برداشت نہیں کیا جائے گا۔انہوں نے افسران و اہلکاروں کوشہریوں کے ساتھ خوش اخلاقی سے پیش آنے کی ہدایت کرتے ہوئے کہا کہ پولیس افسران و اہلکاران اپنی ذمہ داریاں پیشہ ورانہ انداز میں سر انجام دیں اس سے ادارہ کی امیج بلڈنگ میں بھی مدد ملے گی۔ ڈی آئی جی (آپریشنز)سید علی ناصر رضوی، ڈی آئی جی (انوسٹی گیشن) عمران کشور، ایس ایس پی(ایڈمن)عاطف نذیر، ایس ایس پی(آپریشنز)سید علی رضا،ایس ایس پی (انوسٹی گیشن)انوش مسعود چوہدری نے اجلاس میں شرکت کی۔ کینٹ اور ماڈل ٹاؤن ڈویژنز کے ایس پیز، اے ایس پیز،سرکل افسران، ایس ایچ اوز، انچارجز(انوسٹی گیشن)بھی اجلاس میں موجود تھے۔