پنجاب میں چھوت کی بیماریوں کی وجوہات پر نظر رکھنے اور ان کے پھوٹ پڑنے پر فوری رسپانس کا نظام تیار کر لیا گیا ہے۔ ڈاکٹر جمال ناصر

لاہور پاکستان(نمائندہ وائس آف جرمنی): وزیر پرائمری و سیکنڈری ہیلتھ کیئر ڈاکٹر جمال ناصر نے بتایا ہے کہ پنجاب کے تمام سرکاری ہسپتالوں، بنیادی مراکز صحت اور دیہی ہیلتھ سنٹرز کو کمپیوٹرائز کر دیا گیا ہے جہاں آنے والے تمام مریضوں کی بیماریوں اور علاج معالجے کا ریکارڈ محفوظ کیا جا رہا ہے۔ پسماندہ اور دیہاتی علاقوں میں بھی مریضوں کی کیس ہسٹری ڈیجیٹل طریقے سے محفوظ کی جا رہی ہے۔ مریضوں کا یہ ڈیٹا چھوت کی بیماریوں کی روک تھام کے پیشگی اقدامات کرنے کے لئے مددگار ثابت ہو گا۔ اس ڈیٹا کی روشنی میں کسی خاص علاقے میں بیماری پھیلنے کی وجوہات کا تعین کرنے کے علاوہ انہیں روکنے اور ان پر قابو پانے کے اقدامات بھی کئے جائیں گے۔ وزیر پرائمری ہیلتھ برطانوی ہیلتھ سیکورٹی ایجنسی کے تعاون سے منعقدہ ڈاکٹروں کی تربیتی ورکشاپ کا اختتامی اجلاس سے بطور مہمان خصوصی خطاب کر رہے تھے ۔برطانوی ہیلتھ سیکورٹی ایجنسی کی چیف ایگزیکٹو ڈاکٹر جینی ہیرس نے اجلاس کی صدارت کی۔ اس موقع پر انٹرنیشنل ہیلتھ ریگولیشنز کی پراجیکٹ لیڈ ڈاکٹر اینی ولسن اور کنٹری لیڈ ڈاکٹر سرتاج بھی شریک تھے۔ڈاکٹر جمال ناصر نے کہا کہ پنجاب میں چھوت کی بیماریوں کی وجوہات کی سرویلنس(نظر رکھنے) اور بیماری پھوٹ پڑنے پر فوری رسپانس کا نظام تیار کر لیا گیا ہے۔ بیماریوں کی سرویلینس کے لئے
برطانوی ہیلتھ سیکورٹی ایجنسی کے تکنیکی تعاون سے پنجاب کے 18 اضلاع میں ڈاکٹروں اور طبی عملے کی تربیت مکمل کر لی گئی ہے ۔باقی 18 اضلاع میں ڈاکٹروں اور عملے کی تربیت 23 ستمبر سے شروع کی جا رہی ہے ۔انہوں نے کہا کہ برطانوی ہیلتھ ایجنسی کے تکنیکی تعاون سے پنجاب میں بیماریوں کے خلاف سرویلنس سسٹم میں بہتری آئی ہے۔ انہوں نے کہا کہ پنجاب انٹرنیشنل ہیلتھ ریگولیشنز پر عملدرآمد کے سلسلے میں سرگرمی سے کام کر رہا ہے۔ہم۔چھوت کی بیماریوں کی روک تھام کے لئے ڈاکٹروں اور طبی عملے کی تربیت کے سلسلے میں برطانوی ہیلتھ ایجنسی کے تکنیکی تعاون کو قدر کی نگاہ سے دیکھتے ہیں اور پنجاب کے عوام کو خطرناک بیماریوں سے بچانے کیلئے آگاہی مہم چلا رہے ہیں۔ ڈاکٹر جمال ناصر نے کہا کہ برطانوی ہیلتھ سیکورٹی ایجنسی کے وفد کے دورے سے برطانیہ اور پنجاب کے درمیان ہیلتھ کیئر پارٹنر شپ مضبوط ہو گی۔
برطانیہ کی ہیلتھ سکیورٹی کے وفد نے حکومت پنجاب کی طرف سے عوام کو صحت کی بہتر سہولیات فراہم کرنے کی کاوشوں کو سراہا.