ترجمان پنجاب پولیس کے مطابق کرکٹر نے سینٹرل پولیس آفس میں آئی جی پنجاب ڈاکٹر عثمان انور اور ایڈیشنل آئی جی سلطان احمد چوہدری سے ملاقات کی۔ جہاں ان کو اعزازی ڈی ایس پی کے رینک لگائے گئے۔

اس کے بعد شاداب خان نے آئی جی پنجاب کو سلیوٹ کیا اور پولیس میں نمائندگی دینے پر ان کا شکریہ بھی ادا کیا۔

ان کا کہنا تھا کہ ’برینڈ ایمبیسیڈر مقرر کیا جانا میرے لیے اعزاز کی بات ہے، خوشی ہے کہ پنجاب پولیس کا حصہ بن رہا ہوں۔‘

انہوں نے عزم ظاہر کیا کہ ’پنجاب پولیس کے ساتھ منسلک ہو کر اپنا کردار بھرپور طریقے سے ادا کرنے کی کوشش کروں گا۔‘

ان کا مزید کہنا تھا کہ کبھی سوچا نہ تھا کہ وہ کبھی پولیس کا حصہ بنیں گے۔

ایڈیشنل آئی جی پنجاب سلطان احمد چوہدری نے شاداب خان کو سنٹرل پولیس آفس کے مختلف حصوں کا وزٹ کروایا۔

ماضی میں بھی کئی کھلاڑیوں کو اعزازی طور پر پنجاب پولیس کا حصہ بنایا جا چکا ہے جن میں فاسٹ بولر شاہین شاہ آفریدی بھی شامل ہیں۔

ان کو پچھلے سال چار جولائی کو خیبرپختونخوا پولیس میں ڈی ایس پی کا اعزازی رینک دیا گیا تھا۔

اسی طرح بولر نسیم شاہ کو بھی بلوچستان کا خیرسگالی کا سفیر مقرر کیا جا چکا ہے۔