صارفین کے مسائل کے حل کے لئے چیئرمین بورڈ آف ڈائریکٹر زحافظ میاں محمد نعمان کی زیر صدارت کھلی کچہری کا انعقاد۔

لاہور پاکستان(نمائندہ وائس آف جرمنی):‌لیسکو کے ساوتھ سرکل کے زیرانتطام چیئرمین بورڈ آف ڈائریکٹرزحافظ میاں محمد نعمان کی زیر صدارت صارفین کے بجلی سے متعلقہ مسائل کے حل کیلئے کھلی کچہری کا انعقاد کیا گیا جس میں چیف ایگزیکٹو لیسکو چوہدری محمد امین، ممبر بورڈ آف ڈائریکٹرز جہانزیب بدر، ایڈمن ڈائریکٹر، کسٹمر سروسز ڈائریکٹر، چیف انجینئر او اینڈ ایم اور ایس ای ساؤتھ سمیت ساؤتھ سرکل کے تمام ایکسئینز، ایس ڈی اوز اور ریوینیو افسران کے ساتھ ساتھ میڈیا نمائندگان کی ایک بڑی تعداد نے بھی شرکت کی۔اس موقع پر سائلین سے خطاب کرتے ہوئے چیئرمین بورڈ آف ڈائریکٹرزحافظ میاں محمد نعمان کا کہنا تھا عوام کی سہولت کے لئے ہم نے پورے لیسکو ریجن میں کھلی کچہریوں کے انعقادکا سلسلہ شروع کیا ہے۔ ان کا کہنا تھا کہ لیسکو ڈھائی کروڑ سے زائد صارفین کو روشنی اور بجلی دینے کی ذمہ دار ہے۔ ان کا کہنا تھا کہ وزیراعظم پاکستان میاں شہبازشریف کے وژن کے مطابق عوام الناس کی خدمت کے لئے ہم پیش پیش ہیں۔ ان کا کہنا تھا کہ موجودہ حکومت کو عام کی مشکلات کا اندازہ ہے جس میں کمی کے لئے عوام دوست پالیسیاں ترتیب دے رہے ہیں۔ حافظ میاں محمد نعمان کا یہ بھی کہنا تھا کہ جو لیسکو افسران عوام کے مسائل کا حل نہیں کرتے وہ سزا کے لئے تیار رہیں ہم اچھے کاموں پر جزا اور خراب کارکردگی پر سزا کے قانون پر یقین رکھتے ہیں۔چیئرمین بی او ڈی حافظ میاں محمد نعمان اور چیف ایگزیکٹو لیسکو چوہدری محمد امین نے کھلی کچہری میں صارفین کی شکایات سُنیں اور شکایات کے فی الفور ازالے کے لئے موقع پر ہی احکامات جاری کئے اور اس بات کو بھی یقینی بنایا کہ کسی سائل کا مسئلہ باقی نہ رہے.