خواتین کا عالمی دن پر سٹی ٹریفک پولیس کا سلام

لاہور پاکستان(نمائندہ وائس آف جرمنی):‌ چیف ٹریفک آفیسر (سی ٹی او) کیپٹن (ر) مستنصر فیروز نے کہا ہے کہ اسلام خواتین کے حقوق کے تحفظ کا سب سے بڑا علمبردار ہے،خواتین کی عزت و تکریم کا تحفظ، ہماری اجتماعی ذمہ داری ہے۔
سی ٹی او لاہور نے مزید کہا کہ اس دن کا مقصد انکی صلاحیتوں کا اقرار، اہمیت کو اجاگر اور انہیں مزید مستحکم کرنا ہے، زندگی کے کسی بھی شعبے میں خواتین کی اہمیت سے انکار نہیں کیا جاسکتا۔
انہوں نے مزید کہا کہ سٹی ٹریفک پولیس میں لیڈی وارڈنز کو اہم پوسٹس پر تعینات کیا گیا ہے، چار خواتین کو ٹریفک سیکٹرز میں بطور انچارج تعینات کیا گیا ہے،، انسپکٹر فہمیدہ ذیشان انچارج ایجوکیشن، افق گیلانی کو انچارج لائسنسنگ، افرا سعید کو انچارج لبرٹی تعینات کیا گیا ہے۔
مستنصر فیروز نے کہا کہ ٹریفک پولیس میں خواتین کی بڑی تعداد شہریوں کے جان و مال کے تحفظ کو یقینی بنائے ہوئے ہے، لیڈی وارڈنز ایجوکیشن، ٹکٹنگ اور لائسنسنگ دفاتر میں انتہائی احسن طریقے سے اپنی ذمہ داریاں نبھا رہی ہیں۔
سی ٹی او لاہور نے کہا کہ بحیثیت معاشرہ ہمیں عورت کو اس کے حقوق دلانے کیلئے اپنا مثبت کردار ادا کرنا ہوگا، اچھا لب و لہجہ، نرم مزاجی اور خوش گفتاری لیڈی وارڈنز کی پہچان ہے، لیڈی وارڈنز نہ صرف سڑکوں بلکہ دفاتر میں بھی وارڈنز کے شانہ بشانہ اپنا کردار ادا کئے ہوئے ہیں، لیڈی وارڈنز کی فلاح و بہبود کے حوالے سے مثالی اقدامات کئے گئے ہیں۔