چیف سیکرٹری پنجاب نے ای فائلنگ اینڈ آفس آٹو میشن سسٹم (EFOAS) کا دائرہ کار کمشنرز اور ڈپٹی کمشنرز کے دفاتر تک بڑھانے کیلئے ہدایات جاری کر دیں۔
انہوں نے یہ ہدایات آج یہاں سو ل سیکرٹریٹ میں سیکرٹریز کانفرنس کی صدارت کرتے ہوئے جای کیں۔ اجلاس میں محکموں میں پیپر لیس سسٹم پر پیش رفت،زیر التواء انکوائریز اور پنشن کیسز کا جائزہ لیا گیا۔
لاہور پاکستان(نمائندہ وائس آف جرمنی):چیف سیکرٹری نے کہا کہ آئی ٹی کی مددسے گورننس اور سروس ڈلیوری میں بہتری کیلئے اصلاحات متعارف کرائی جا رہی ہیں، تمام ڈویژنل کمشنرز ور ڈپٹی کمشنرز کے دفاتر کو بھی ای فائلنگ کے نظام سے منسلک کیا جائے گا۔ انہوں نے کہا کہ جنوبی پنجاب میں EFOAS پہلے ہی کامیابی سے جاری ہے۔انہو ں نے ہدایت کی کہ تمام محکموں میں پیپر لیس سسٹم کے حوالے سے افسران کی ٹریننگ 15جون تک مکمل کر لی جائے۔
چیف سیکرٹری نے زیر التواء محکمانہ انکوائریز اور پنشن کیسز کو جلد از جلد نمٹا نے سے متعلق بھی ہدایات جاری کیں۔انہوں نے کہا کہ چھ ماہ سے زائد کوئی انکوائری زیر التواء نہ رہے اورریٹائرڈ سرکاری ملازمین کو پنشن بلا تاخیر جاری کی جائے۔چیئرمین پی آئی ٹی بی فیصل یوسف نے اجلاس کو EFOASاور دیگر آئی ٹی اصلاحات پر بریفنگ دی۔ اجلاس کو بریفنگ میں بتایا گیا کہ زیر التواء انکوائریز اور پنشن کیسز کو ترجیحی بنیادوں پر نمٹایا جا رہا ہے،گزشتہ ایک ماہ کے دوران پروموشن بورڈز اور محکمانہ کمیٹیوں نے 41سو سے زائد ملازمین کو اگلے گریڈز میں ترقی دی ہے۔ ایڈیشنل چیف سیکرٹری، ایڈیشنل چیف سیکرٹری (جنوبی پنجاب)، ایڈیشنل چیف سیکرٹری داخلہ،سینئر ممبر بورڈ آٖ ف ریونیو، چیئرمین پلاننگ اینڈ ڈویلپمنٹ اور محکموں کے سیکرٹریز نے اجلاس میں شرکت کی جبکہ تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔
