رائل ملٹری اکیڈمی سینڈہرسٹ برطانیہ میں ملٹری ڈرل کے معیار کو جانچنے کے لیے سالانہ منعقد ہونے والے انٹرنیشنل پیس سٹکنگ 2023 کے مقابلے اختتام پذیر ہو گئے۔
ان مقابلوں میں پاکستان آرمی نے دوسری پوزیشن حاصل کی ہے۔
آئی ایس پی آر کی جانب سے جاری کیے گئے بیان کے مطابق پاکستان آرمی نے سنہ 2018 میں پہلی بار انٹرنیشنل پیس سٹکنگ کے مقابلوں میں حصہ لیا۔
’سالانہ منعقد ہونے والے منفرد طرز کے مقابلوں میں اب تک مجموعی طور پاکستان آرمی نے سال 2018, 2019 اور 2020 میں پہلی پوزیشن حاصل کی جبکہ سال 2022 اور 2023 میں پاکستان آرمی کی ٹیم دوسری پوزیشن حاصل کرنے میں کامیاب رہی۔‘
سال 2021 میں کورونا کی وبا کی وجہ سے مقابلے منسوخ کر دیے گئے تھے۔
سال 2023 کے مقابلوں میں پاکستان آرمی کے حوالدار نعمان کو بہترین انفرادی ڈرل سارجنٹ کے اعزاز سے نوازا گیا۔
انٹرنیشنل پیس سٹکنگ 2023 میں کل 16 ملکوں کی ٹیموں نے حصہ لیا۔ اختتامی تقریب میں پاکستان سے کل پانچ ڈرل سارجنٹس نے حصہ لیا۔
بیان کے مطابق پاکستان ملٹری اکیڈمی کے مایہ ناز ڈرل سکواڈکی کارکردگی کو برطانوی ناظرین کی طرف سے پسند کیا گیا اور بے حد سراہا گیا۔
