ایشیا کپ: بابر اعظم اور افتخار احمد کی جارحانہ بیٹنگ، پاکستان کا نیپال کو 343 رنز کا ہدف
پاکستان نے مقررہ 50 اوورز میں چھ وکٹوں کے نقصان پر 342 رنز بنائے۔
ایشیا کپ کے پہلے میچ میں پاکستان نے نیپال کو جیتنے کے لیے 343 رنز کا ہدف دے دیا ہے۔
پاکستان نے مقررہ 50 اوورز میں چھ وکٹوں کے نقصان پر 342 رنز بنائے۔
گرین شرٹس کی جانب سے بابر اعظم اور افتخار احمد نے شاندار سینچریاں سکور کیں۔
پاکستان کی جانب سے بابر اعظم 14 چوکوں اور چار چھکوں کی مدد سے 151 جبکہ افتخار احمد 11 چوکوں اور چار چھکوں کی مدد سے 109 رنز بنا کر نمایاں رہے۔
ان کے علاوہ پاکستان کے لیے محمد رضوان نے 44 رنز کی اننگز کھیلی۔
یہ بابر اعظم کی ون ڈے فارمیٹ میں 19ویں جبکہ افتخار احمد کی پہلی سینچری ہے۔
نیپال کی طرف سے بولنگ کرتے ہوئے سومپال کامی نے دو جبکہ کرن کے سی اور سندیپ لمیچنے نے ایک ایک وکٹ حاصل کی۔
بدھ کے روز ملتان میں کھیلے جا رہے میچ میں پاکستان نے ٹاس جیت کر پہلے بیٹنگ کا فیصلہ کیا۔
میچ میں نیپال کو پہلی کامیابی 5.3 اوورز میں ملی جب فخر زمان کرن کے سی کی گیند پر وکٹوں کے پیچھے آصف شیخ کے ہاتھوں کیچ آؤٹ ہوگئے۔
پاکستان کی دوسری وکٹ 25 رن پر گری جب اوپننگ بیٹر امام الحق پانچ کے انفرادی سکور پر رَن آؤٹ ہو گئے۔
تیسری وکٹ کے لیے بابر اعظم اور محمد رضوان کے درمیان 86 رن کی شراکت دیکھنے کو ملی تاہم محمد رضوان 44 کے سکور پر رن آؤٹ ہوگئے۔
نیپال کو چوتھی کامیابی آغا سلمان کی وکٹ کی صورت میں ملی جب وہ پانچ رن بنا کر ریورس سویپ مارنے کی کوشش میں آؤٹ کیچ آؤٹ ہوگئے۔
پاکستان کی پانچویں وکٹ 338 رنز پر گری جب بابر اعظم 151 کے سکور پر سومپال کامی کی گیند پر کیچ آؤٹ ہوگئے۔
پاکستان کی چھٹی وکٹ 342 کے سکور پر گری جبب شاداب خان سومپال کامی کی گیند پر بولڈ ہوگئے۔
پاکستان اور نیپال کی ٹیمیں پہلی مرتبہ ون ڈے فارمیٹ میں آمنے سامنے آئی ہیں۔
دوسری جانب نیپال پہلی مرتبہ ایشیا کپ کا کوئی میچ کھیل رہا ہے۔
نیپال نے رواں برس اے سی سی مینز پریمیئر کپ جیت کر ایشیا کپ میں رسائی حاصل کی تھی۔
پاکستان نے میچ سے قبل اپنی پلیئنگ الیون کا بھی اعلان کر دیا تھا۔
بابر اعظم (کپتان)، شاداب خان (نائب کپتان)، فخر زمان، امام الحق، سلمان علی آغا، افتخار احمد، محمد رضوان، محمد نواز، نسیم شاہ، شاہین شاہ آفریدی، حارث رؤف۔
پاکستان اور نیپال کے درمیان ایشیا کپ کا پہلا میچ پاکستانی وقت کے مطابق دوپہر 2 بج کر 30 منٹ پر شروع ہوا جسے شائقینِ کرکٹ ٹی وی پر پی ٹی وی سپورٹس، ٹین سپورٹس جبکہ ڈیجیٹل پلیٹ فارمز پر ٹیپ میڈ ایپ اور تماشہ ایپ پر دیکھ سکتے ہیں۔
