چیف سیکرٹری کا سپیشل برانچ ہیڈ کوارٹرز (رابرٹس کلب) کا دورہ،تاریخی حالت میں بحال کئے گئے کینن بلاک کا افتتاح
آئی ٹی کے ذریعے خدمات کی فراہمی بہتر بنانے کی ضرورت ہے،محکموں کو دور جدید کے تقاضوں سے ہم آہنگ کرنا ہوگا، رابرٹس کلب کی تاریخی عمارت کی بحالی پر آئی جی پنجاب اور ایڈیشنل آئی جی سپیشل برانچ مبارکباد کے مستحق ہیں۔ زاہد اختر زمان
لاہور پاکستان(نمائندہ وائس آف جرمنی):چیف سیکرٹری پنجاب زاہد اختر زمان نے پنجاب پولیس سپیشل برانچ ہیڈ کوارٹرز (رابرٹس کلب) کا دورہ کیا اور تاریخی حالت میں بحال کئے گئے کینن بلاک کی افتتاحی تختی کی نقاب کشائی کی۔آئی جی پنجاب ڈاکٹر عثمان انور اور ایڈیشنل آئی جی سپیشل برانچ ذوالفقار حمید نے چیف سیکرٹری پنجاب کو خوش آمدید کہا۔
جدید ٹیکنالوجی کے ذریعے خدمات کی فراہمی مزید بہتر بنانے کی ضرورت پر زور دیتے ہوئے چیف سیکرٹری نے کہا کہ سرکاری اداروں کو دور جدید کے تقاضوں سے ہم آہنگ کرنا ہوگا۔ انہوں نے کہا کہ محکموں کی استعداد میں اضافے کیلئے ہر ممکن وسائل فراہم کر رہے ہیں۔انہوں نے کہا کہ رابرٹس کلب کی تاریخی عمارت کی بحالی پر آئی جی پنجاب اور ایڈیشنل آئی جی سپیشل برانچ مبارک باد کے مستحق ہیں۔
چیف سیکرٹری نے کہا کہ سپیشل برانچ آرگنائزڈ کرائم کی سرکوبی اورگڈ گورننس کے لئے حکومت پنجاب اور پولیس کیلئے آنکھ اور کان کی حیثیت رکھتی ہے۔ انہوں نے مزید کہا کہ امن و امان برقرار رکھنے، فرقہ واریت، جعلی خوراک و ادویات کی روک تھام، مانیٹرنگ اور سرویلنس میں سپیشل برانچ کا کردار نہایت اہم ہے۔
چیف سیکرٹری اور آئی جی نے نئے تعمیر شدہ کینن بلاک کے مختلف حصوں کا معائنہ کیا۔ایڈیشنل آئی جی ذوالفقار حمید نے چیف سیکرٹری کو پنجاب پولیس سپیشل برانچ میں آفس آٹومیشن بارے بریفنگ دی اور انہیں سووینئر پیش کیا۔سیکرٹری تعمیرات و مواصلات سہیل اشرف اور پولیس کے اعلیٰ افسران بھی اس موقع پر موجود تھے۔
