عوام کی جان و مال کی حفاظت کیلئے جانیں قربان کرنے والے شہداء اور غازی ہمارے ماتھے کا جھومر ہیں، سی سی پی او لاہور

لاہور پاکستان(نمائندہ وائس آف جرمنی): سی سی پی او لاہور بلال صدیق کمیانہ سے شہدائے پولیس کے اہل ِ خانہ، غازیوں اور ملازمین کے معذور بچوں نے ملاقات کی۔سربراہ لاہور پولیس نے شہدائے پولیس کے اہل خانہ کو بتایاکہ آئی جی پولیس پنجاب ڈاکٹرعثمان انورشہداء کے ورثاء، غازیوں اورپولیس ملازمین کے اہل خانہ کی ویلفیئر کیلئے انقلابی اقدامات کر رہے ہیں اور انہو ں نے شرکاء سے درپیش مسائل بارے دریافت کیا،موقع پر مسائل کو ترجیحی بنیادوں پر حل کرنے کے احکامات جاری کئے۔ سی سی پی او نے کہاکہ شہدائے پولیس کے اہل ِ خانہ، غازی اورخصوصی بچوں کے والدین کیلئے ہمارے دروازے ہر وقت کھلے ہیں۔ پولیس ملازمین کے معذور بچوں کا علاج بہترین طبی اداروں سے کروایا جارہا ہے۔ پولیس ملازمین کے معذور بچوں کوالیکٹرک ویل چیئرز، ہیئرنگ ڈیوائسزاور ماہانہ وظائف کی فراہمی سمیت بہترین علاج معالجہ بھی کروایا جا رہا ہے۔بلال صدیق کمیانہ نے کہاکہ عوام کی جان و مال کی حفاظت کیلئے جانیں قربان کرنے والے شہداء اور غازی ہمارے ماتھے کا جھومر ہیں۔ شہداء نے فرض کی راہ میں جان قربان کرکے محکمہ پولیس کا وقار بلند کیا ہے۔ شہدائے پولیس کے ورثا، غازیوں اور ملازمین کے اہل خانہ کے علاج معالجے کیلئے ہر ممکن وسائل بروئے کار لائے جا رہے ہیں۔