پی ٹی اے اور ٹک ٹاک کا محفوظ ڈیجیٹل ماحول کی فراہمی کے لیے مفاہمتی یاداشت پر دستخط

پاکستان لاہور (نمائندہ وائس آف جرمنی): پاکستان ٹیلی کمیونیکیشن اتھارٹی (پی ٹی اے) اور ٹک ٹاک نے کثیر جہتی نقطہ نظر کے تحت پاکستان کے سرکاری اسکولوں میں ڈیجیٹل سیفٹی کو فروغ دینے کے لیے باہمی تعاون کے ذریعے مفاہمت کی یادداشت (ایم او یو) پر دستخط کیے۔
اس پروگرام میں اساتذہ، والدین اور طلباء کے لیے جامع تربیتی پروگرام اور رہنما خطوط شامل ہیں جس میں ورکشاپس، سیمینارز، ویبینار، آگاہی ویڈیوز وغیرہ کے ذریعے سوشل میڈیا کے محفوظ اور صحیح استعمال پر روشنی ڈالی جائے گی اور بتایا جائے گا کہ کیسے اس سے منسوب نقصانات سے مؤثر طرز اور دانشمندی سے نمٹا جائے۔ یہ شراکت داری ڈیجیٹل دائرہ کار میں عوام کے مفادات کے تحفظ کے لیے پی ٹی اے کی عزم کو ظاہر کرتی ہے۔
اس اہم تقریب میں چیئرمین پی ٹی اے، میجر جنرل (ریٹائرڈ) حفیظ الرحمن، ڈائریکٹر جنرل (ویب انالیسز ڈیپارٹمنٹ) اور ڈائریکٹر جنرل (سٹریٹیجی اینڈ ڈویلپمنٹ) کے ساتھ ساتھ وزارت آئی ٹی و ٹیلی کام کے نمائندے، جوائنٹ ڈائریکٹر پالیسی اینڈ سیکٹر گروتھ اور ڈائریکٹر انٹرنیٹ گورننس انٹرنیشنل بھی موجود تھے۔ ٹک ٹاک پر پاکستان کے لئے پبلک پالیسی اینڈ گورنمنٹ ریلیشنز کے سربراہ فہد خان نیازی کے ساتھ ساتھ ٹک ٹاک کے لیے پبلک پالیسی پروگرامز ساؤتھ ایشیا کی سربراہ محترمہ زارا بشارت ہگز بھی موجود تھیں۔
دوران تقریب اظہار خیال کرتے ہوئے چیئرمین پی ٹی اے نے کہا کہ پی ٹی اے ڈیجیٹل تحفظ کے حوالے سے پر عزم ہے۔ ٹک ٹاک کے ساتھ یہ شراکت ایک اہم سوشل میڈیا پلیٹ فارم کے ذریعے محفوظ آن لائن ماحول کی جانب پی ٹی اے کا ایک اہم قدم ہے۔
یہ تعاون محفوظ ڈیجیٹل ماحول کی فراہمی کے لیے دونوں اداروں کے نظریات کی عکاسی کرتا ہے جن میں تحفظ سب کے لئے اہم ہے۔پی ٹی اے کو یقین ہے کہ یہ اقدام دیگر سوشل میڈیا پلیٹ فارمز کے لئے ایک اہم پیش رفت ہے جس سے انہیں مقامی سطح پر ڈیجیٹل ماحول کے فروغ کے لیے پی ٹی اے سے الحاق کی تحریک ہوگی ۔