موبائل فونز اور پام آئل کی درآمدات میں نمایاں کمی

اسلام آباد : پاکستان میں سالانہ بنیادوں پر پام آئل اور موبائل فونز کی درآمدات میں نمایاں کمی ریکارڈ کی گئی ہے۔
تفصیلات کے مطابق موبائل فونز کی درآمدات میں جاری مالی سال کے پہلے 2 ماہ میں سالانہ بنیادوں پر نمایاں کمی ریکارڈ کی گئی ہے۔
اس حوالے سے اسٹیٹ بینک کی جانب سے جاری کردہ اعداد و شمار کے مطابق جولائی اور اگست میں موبائل فونز کی درآمدات کا حجم 8.314 ملین ڈالر ریکارڈ کیا گیا جو گذشتہ مالی سال کی اسی مدت کے مقابلہ میں 613 فیصد کم ہے۔
اس کے علاوہ گذشتہ مالی سال کی اسی مدت میں موبائل فونز کی درآمدات کا حجم 59.31 ملین ڈالر ریکارڈ کیا گیا تھا۔
اگست میں موبائل فونز کی درآمدات پر 4.979 ملین ڈالر زرمبادلہ صرف ہوا جو جون میں 3.33 ملین ڈالر اور گذشتہ سال اگست میں 43.66 ملین ڈالر تھا۔
مالی سال 2023 میں موبائل فونز کی درآمدات کا حجم 89.93 ملین ڈالر ریکارڈ کیا گیا تھا۔ واضح رہے کہ جاری مالی سال کے پہلے 2 ماہ میں ٹیلی کام گروپ کی درآمدات پر 227.26 ملین ڈالر زرمبادلہ صرف ہوا جو گذشتہ مالی سال کی اسی مدت میں 123.71 ملین ڈالر ریکارڈ کیا گیا تھا
دوسری جانب ملک میں پام آئل کی درآمدات میں بھی اگست 2023کے دوران سالانہ بنیادوں پر 13فیصد کمی ریکارڈ کی گئی۔
پاکستان بیورو برائے شماریات کی جانب سے جاری کر دہ اعداد و شمار کے مطابق اگست 2022میں پام آئل کی درآمدات کا حجم 92.1ارب روپے ریکارڈ کیا گیا تھا جو رواں سال اگست میں 13فیصد کم ہوکر80.3ارب روپے ہوگیا۔