بلال صدیق کمیانہ کی ہدایت پرپولیس گارڈ نے فرض کی راہ میں جام شہادت نوش کرنے والے پولیس شہداء کی لازوال قربانیوں کو خراج تحسین پیش کیا گیا

لاہور پاکستان(نمائندہ وائس آف جرمنی): کیپیٹل سٹی پولیس آفیسرلاہور بلال صدیق کمیانہ کی ہدایت پرپولیس گارڈ نے پولیس شہداء سب انسپکٹر محمد وسیم، کانسٹیبل مصور علی اور کانسٹیبل سرور بیگ کی برسی پر قبور پر حاضری دی۔لاہور پولیس کے چاق و چوبند دستے نے شہداء کی قبورکو سلامی پیش کی، پھولوں کی چادر چڑھائی اور فاتحہ خوانی کی۔اس موقع پر فرض کی راہ میں جام شہادت نوش کرنے والے پولیس شہداء کی لازوال قربانیوں کو خراج تحسین پیش کیا گیا۔
ترجمان لاہورپولیس کے مطابق سب انسپکٹر محمد وسیم اور کانسٹیبل مصور 18جنوری1997ء کو سیشن کورٹ ڈیوٹی کے دوران بم دھماکے میں شہادت کے منصب پر فائز ہوئے جبکہ کانسٹیبل سرور بیگ مجاہد سکواڈ شرپسند عناصر کی فائرنگ کے نتیجے میں شہید ہوئے۔ درین اثناء اپنے بیان میں سی سی پی او بلال صدیق کمیانہ نے کہاکہ لاہور پولیس کی تاریخ فرض کی راہ میں شہادت پانے والے جانثاروں سے بھری پڑی ہے۔پولیس فورس کا قیامِ امن میں مثالی کردار ہے۔ محکمہ پولیس کی جانب سے شہداء کے ورثا کو گھروں کی فراہمی، بچوں کیلئے سکالرشپس اور ملازمتوں کیلئے اقدامات کئے جا رہے ہیں۔انہوں نے مزیدکہاکہ شہداء کے بچے ہمارے بچے ہیں، شہداء کی فیملیز کو تنہا نہیں چھوڑا جائے گا،ہم اپنے شہدا ء اوران کے اہل خانہ کی دیکھ بھال کیلئے سرگرم ہیں۔