وزیر اعلیٰ محسن نقوی کا ایلیٹ پولیس اور ہائی وے پٹرولنگ پولیس کے ہیڈکوارٹر کا دورہ، کنٹرول روم کا معائنہ کیا، ہائی وے پٹرولنگ کے سسٹم کا مشاہدہ کیا
پنجاب بھر میں بغیر لائسنس گاڑیاں اورموٹر سائیکل چلانے والوں کے خلاف کریک ڈاؤن جاری ہے،روڈ سیفٹی کے حوالے سے ہر ممکنہ اقدام اٹھایا جارہا ہے
پاکستان لاہور(نمائندہ وائس آف جرمنی):وزیر اعلیٰ پنجاب محسن نقوی نے بیدیاں روڈپر ایلیٹ پولیس فورس پنجاب اورپنجاب ہائی وے پٹرولنگ پولیس کے صوبائی ہیڈکوارٹر کا دورہ کیا اور ایلیٹ پولیس فورس آفیسرز بلاک، پنجاب ہائی وے پولیس پٹرولنگ آفیسرز بلاک اور دیگر شعبوں کامعائنہ کیا۔ وزیراعلیٰ محسن نقوی نے پنجاب ہائی وے پٹرولنگ پولیس کے کنٹرول روم کا وزٹ کیا اورکنٹرول روم سے ہائی وے پٹرولنگ کے سسٹم کا مشاہدہ کیا۔وزیر اعلیٰ محسن نقوی نے پولیس افسران سے ملاقات کی اور جانفشانی و پروفیشنل انداز سے فرائض سرانجام دینے کی ہدایت کی۔ وزیر اعلیٰ محسن نقوی نے کہا کہ پنجاب بھر میں بغیر لائسنس گاڑیاں اورموٹر سائیکل چلانے والوں کے خلاف کریک ڈاؤن جاری ہے۔روڈ سیفٹی کے حوالے سے ہر ممکنہ اقدام اٹھایا جارہا ہے، روڈ سیفٹی کے حوالے سے پٹرولنگ پولیس کو لیڈ لینی ہے۔وزیراعلیٰ محسن نقوی نے پنجاب ہائی وے پٹرولنگ پولیس کے کیفے ٹیریا کا بھی دورہ کیا اور معیار کو سراہا۔انسپکٹر جنرل پولیس ڈاکٹر عثمان انور اور ایڈیشنل آئی جی پنجاب ہائی وے پٹرولنگ پولیس نے کنٹرول روم کے بارے میں بریفنگ دی۔ انسپکٹر جنرل پولیس،سیکرٹری تعمیرات ومواصلات،سی سی پی او،ایڈیشنل آئی جی ایلیٹ،ایڈیشنل آئی جی پنجاب ہائی وے پٹرولنگ،ڈی آئی جی ایلیٹ، ڈی آئی جی پنجاب ہائی وے پٹرولنگ اور متعلقہ افسران بھی اس موقع پر موجود تھے۔
