تحریک انصاف کے سینیئر نائب صدر شیر افضل مروت کو پولیس نے لاہور ہائی کورٹ کے باہر سے حراست میں لے لیا ہے۔
جمعرات کو لاہور کی پولیس نے پاکستان تحریک انصاف کے راہنما شیر افضل مروت کو لاہور ہائیکورٹ کے گیٹ سے اس وقت گرفتار کر لیا جب وہ بار سے خطاب کے بعد عمارت سے نکل رہے تھے۔
پولیس نے ابھی تک یہ واضع نہیں کیا کہ ان کی گرفتاری کی وجوہات کیا ہیں۔
شیر افضل مروت کو تحریک انصاف لائیرز ونگ نے لاہور ہائی کورٹ بار میں خطاب کی دعوت دے رکھی تھی۔
وہ جمعرات کی صبح ہی ہائی کورٹ میں پہنچے تھے اور انہوں نے تحریک انصاف کے وکلا سے خطاب کے بعد میڈیا سے گفتگو بھی کی تھی۔
تاہم ان کے ہائیکورٹ سے روانہ ہونے سے پہلے ہی عدالت کی عمارت کے باہر پولیس کی بھاری نفری تعینات کر دی گئی۔
وہ وکلا کے ہمراہ جیسے ہی ہائی کورٹ کے جی پی او گیٹ سے باہر نکلے تو پولیس کی اینٹی رائٹس فورس نے انہیں حراست میں لے لیا۔
عینی شاہدین کے مطابق ان کے ساتھ آنے والے وکلا نے شیر افضل مروت کی گرفتاری کے وقت مزاحمت بھی کی تاہم پولیس نے انہیں پھر بھی گرفتار کر لیا۔
شیر افضل مروت کو گرفتاری کے بعد تھانہ مزنگ میں رکھا گیا ہے۔
خیال رہے کہ چند دن پہلے بھی شیر افضل مروت کی قبائلی ضلع باجوڑ جاتے ہوئے گرفتار کیے جانے کی اطلاعات ملی تھی، تاہم کچھ دیر بعد ان کے ایکس اکاؤنٹ سے ٹویٹ کیا گیا کہ شیر افضل مروت کو گرفتار نہیں کیا گیا بلکہ وہ محفوظ مقام پر ہیں۔
