لاہور پاکستان(نمائندہ وائس آف جرمنی):وفاقی وزیر داخلہ و انسداد منشیات محسن نقوی نے کہا ہے کہ پاکستان کی خود مختاری پر کوئی آنچ نہیں آنے دیں گے،دہشت گردوں کو انہی کی زبان میں جواب دیں گے، جو پاکستان پر حملہ کرے گا اس کے ساتھ ویسا ہی سلوک ہوگا۔وہ منگل کے روز صوبائی الیکشن کمیشن میں سینیٹ الیکشن کے سلسلہ میں کاغذات کی جانچ پڑتال کے بعد میڈیا سے گفتگو کر رہے تھے۔ وفاقی وزیر داخلہ نے کہا کہ اللہ نے چاہا تو 2اپریل کو کامیابی ہوگی اور تمام سیاسی جماعتوںو دوستوں کا شکر گزار ہوں جنہوں نے نامزد کیا ۔انہوں نے کہاکہ دہشتگردی پر کوئی سمجھوتہ نہیں ہوگا اور پاکستان کے خلاف منصوبہ بندی کرنے والوں کو انہی کی زبان میں جواب دیں گے۔انہوں نے کہا کہ پاکستان میں جو بھی غیر قانونی مقیم ہیں ان سب کو یہاں سے جانا پڑے گا، آپ ویزہ لیں اور پھر واپس آئیں۔محسن نقوی نے کہاکہ سوشل میڈیا کا غلط استعمال ہو رہا ہے ۔ایف آئی اے میں اصلاحات لائیں گے ،آپ ایف آئی اے میں مثبت تبدیلی دیکھیں گے۔وفاقی وزیر داخلہ کا کہنا تھا کہ اس وقت کچھ چیلنجز درپیش ہیں،ملک میں دہشتگردی کی ایک لہر آئی ہوئی ہے، ہم ان شااللہ دہشتگردی کا مقابلہ کریں گے ، کسی پر غلط الزام لگانا غلط بات ہے۔انہوں نے کہا کہ افواج اور عدلیہ کے خلاف سوشل میڈیا پر مہم چلائی جارہی ہے،دنیا بھر میں سوشل میڈیا کے قوانین پر عمل ہوتا ہے، ابھی امریکہ میں کئی چیزوں کے بعد چارچ شیٹ لگاکر ٹک ٹاک بند ہوا ہے، آزادی اظہار رائے پر پابندی نہیں ہونی چاہیے۔محسن نقوی نے کہاکہ جو سوشل میڈیا کو غلط اور منفی انداز میں استعمال کررہے ہیں ان کو دیکھنا پڑے گا۔قبل ازیں وفاقی وزیر داخلہ محسن نقوی صوبائی الیکشن کمیشن کے دفتر آئے جہاں ان کے کاغذات نامزدگی کی سکرونٹی کی گئی،ریٹرنگ آفیسر اعجاز انور چوہان نے کاغذات کی جانچ پڑتال کی۔واضح رہے کہ وفاقی وزیر داخلہ محسن نقوی آزاد حیثیت سے سینٹ کا الیکشن لڑیں گے اور ان کے تجویز کنندہ و تائید کنندہ مسلم لیگ ن خواجہ عمران نذیر ،پیپلز پارٹی کے حیدر گیلانی، مسلم لیگ قائداعظم کے شافع حسین اور استحکام پاکستان پارٹی کے غضنفر چھینہ بھی اس موقع پر موجود تھے۔
