![](https://vogurdunews.de/wp-content/uploads/2023/11/WhatsApp-Image-2023-11-29-at-7.54.10-PM-780x470.jpeg)
لیسکو اپنے ملازمین کے حقوق کی پاسداری کے لیئے ہمیشہ کوشاں ہے۔چیف ایگزیکٹو انجینئر شاہد حیدر
لیسکو نہ صرف صارف دوست کمپنی ہے بلکہ وہ اپنے20500 سے زائد ملازمین کے حقوق کی پاسداری کے لیئے بھی ہمہ وقت کوشاں رہتی ہے
لاہور پاکستان(نمائندہ وائس آف جرمنی): چیف ایگزیکٹو لیسکو انجینئر شاہد حیدر کا کہنا ہے کہ لیسکو نہ صرف صارف دوست کمپنی ہے بلکہ وہ اپنے20500 سے زائد ملازمین کے حقوق کی پاسداری کے لیئے بھی ہمہ وقت کوشاں رہتی ہے۔اس کے ساتھ ساتھ لیسکو کے دوران ملازمت وفات پا جانے والے ملازمین کے بچوں کے لیئے بھی ملازمتوں کے دروازے کھول دئیے جاتے ہیں تاکہ وہ اپنے والدین کی طرح کمپنی کی کامیابی میں بڑھ چڑھ کر حصہ لیں۔ چیف ایگزیکٹو لیسکو انجینئر شاہد حیدر نے ان خیالات کا اظہار دوران ملازمت وفات پانے والے ملازمین کے بچوں کو تقرر نامے دینے کے لیئے منعقد کی گئی ایک تقریب کے دوران کیا۔ اس موقع پر ڈائریکٹر ایچ آر محمد نعمان غفور، منیجر ایچ آر ہما چیمہ، آل پاکستان واپڈا ہائیڈرو یونین کے جنرل سیکریٹری خورشید احمد خان اور لیسکو ورکرز یونین کے عہدیداران نے بھی شرکت کی۔لیسکو ترجمان کے مطابق مجموعی طور پر26ملازمین کے ورثاء جن میں خواتین بھی شامل ہیں، میں ملازمت کے تقرر نامے تقسیم کئے گئے۔ ملازمین کے بچوں میں اکاؤنٹ اسسٹنٹ، کمرشل اسسٹنٹ، یو ڈی سی، لائن سپرنٹنڈنٹ گریڈII-، ایس ایس اوII-، ایل ڈی سی، اسسٹنٹ لائن مین اور نائب قاصدکیڈرکے تقرر نامے تقسیم کیئے گئے۔چیف ایگزیکٹو لیسکو انجینئر شاہد حیدر اور ڈائریکٹر ایچ آرمحمد نعمان غفور نے اس موقع پر اپنے خطاب میں بھرتی ہونے پر تمام افراد کو مبارک باد دی اور اس امید کا اظہار کیا کہ وہ بھی اپنے والدین کی طرح اپنی ڈیوٹی پوری ذمہ داری سے سر انجام دیں گے۔ اس موقع پر آل پاکستان واپڈا ہائیڈرو یونین کے جنرل سیکریٹری خورشید احمد خان نے لیسکو انتظامیہ کا شکریہ ادا کیا اور بھرتی ہونے والے تمام ملازمین کو مبارکباد دی اور بھرتی ہونے والے لائن سٹاف کو خصوصی طور پر سیفٹی قوانین پر ہر صورت عمل درآمد کرنے کی تلقین کی۔ ان کا کہنا تھا یہ لیسکو کی ایک اچھی روایت ہے اور باقاعدگی کے ساتھ اس تقریب کا کامیابی سے انعقاد کرنے پر ایچ آر ڈیپارٹمنٹ مبارکباد کا مستحق ہے۔