چیف سیکرٹری نے پی ایچ اے کی جانب سے شہریوں کیلئے پھولوں کی نمائش کے انعقاد کو سراہا اور کہا کہ نمائش سے شہریوں کو بہترین تفریح میسر آئیگی

لاہور پاکستان(نمائندہ وائس آف جرمنی):‌پارکس اینڈ ہارٹیکلچر اتھارٹی (پی ایچ اے)کے زیر اہتمام جیلانی پارک میں گل داؤدی کی سات روزہ سالانہ نمائش کاآغاز پیر کے روز ہوا۔ چیف سیکرٹری پنجاب زاہد اختر زمان نے نمائش کا افتتاح کیا اور رنگا رنگ پھولوں کی دل آویز ترتیب اور تشکیل میں گہری دلچسپی کا اظہار کیا۔
چیف سیکرٹری نے پی ایچ اے کی جانب سے شہریوں کیلئے پھولوں کی نمائش کے انعقاد کو سراہا اور کہا کہ نمائش سے شہریوں کو بہترین تفریح میسر آئیگی۔ انہوں نے کہا کہ نمائش کیلئے پی ایچ اے لاہور نے تمام پھول مقامی نرسریوں میں تیار کئے ہیں، استعداد میں اضافہ ہونا قابل ستائش ہے۔
چیف سیکرٹری نے کہا کہ عوام کی تفریح کیلئے دیگر شہروں میں بھی اسی قسم کی نمائشوں کا انعقاد کیا جائے گا۔ انہوں نے کہا کہ شہروں کی خوبصورتی کیلئے تمام پی ایچ ایز کو درکار وسائل فراہم کئے جا رہے ہیں۔
انہوں نے کہا کہ سموگ کے خاتمے کیلئے عملی اقدامات کئےجا رہے ہیں۔ انہوں نے کہا کہ ماحولیاتی آلودگی پر قابو پانے کیلئے لاہور میں سائیکلنگ اور پیدل چلنے کے کلچر کو فروغ دیا جائے گا اور اس مقصد کیلئےخصوصی ٹریک بنائے جائیں گے۔
ڈی جی پی ایچ اے طاہر وٹو نے کہا کہ جیلانی پارک میں 35،000 سے زائد پودوں اور پھولوں کی مدد سے دلکش منظر کشی کی گئی ہے جو اربن لینڈ سکیپنگ کے تناظر میں ایک منفرد کاوش ہے۔ انہوں نے کہا کہ پی ایچ اے نے اس بار نمائش میں پھولوں کی ورائٹی کیساتھ انتظامات اور لائٹنگ میں اضافہ کیا ہے، شہریوں کیلئے فوڈ کورٹ، میوزک شو اور لیزر لائٹ شو کا انعقاد کیا گیا ہے۔
سیکرٹری ہاوسنگ ساجد ظفر ڈال،کمشنر لاہور ڈویژن محمد علی رندھاوا اورپی ایچ اے کے افسران اس موقع پر موجود تھے۔