جلوپارک میں ٹوٹی سڑکیں، خراب صورتحال، وزیراعلیٰ محسن نقوی برہم

لاہور پاکستان(نمائندہ وائس آف جرمنی):‌وزیراعلی محسن نقوی نے شالا مار باغ کا دورہ کیا اورباغ کی مجموعی صورتحال کا تفصیلی جائزہ لیا۔وزیراعلی محسن نقوی نے خصوصی رکشہ میں بیٹھ کر شالا مارباغ کا راؤنڈ لیا اور کہا کہ شالا مار باغ کو اصل تاریخی حالت میں بحال کیا جائے گا۔ وزیراعلی محسن نقوی نے شالا مار باغ کے اطراف ناجائز تعمیرات کے خاتمے کا حکم دیتے ہوئے ڈپٹی کمشنر لاہور کو ٹاسک دے دیا۔وزیراعلیٰ محسن نقوی نے شالا مار باغ کی بیرونی دیوار کے ساتھ بارش کے دوران جمع ہونے والے پانی کی نکاسی کے پائیدار حل کی ہدایت کی۔وزیراعلی محسن نقوی نے ایم ڈی واسا کو موقع پر ہی طلب کرلیا اورمسئلے کے حل کے لئے احکامات دئیے۔وزیر اعلیٰ نے ہدایت کی کہ باغ کے آخری ٹیرس کی دیوار کے ساتھ بھی جمع ہونے والے پانی کا مستقل حل تلاش کیا جائے اور باغ کے پانی کو صاف رکھا جائے۔انہوں نے کہا کہ شالا مار باغ کوپرانی تاریخی حیثیت میں بحال کریں گے۔شالا مار باغ میں شہریوں کو بہترین تفریحی و سیاحتی سہولتیں فراہم کریں گے۔ شالا مار باغ کی عمارت کے تاریخی ورثے کو محفوظ کیا جائے گا۔ ڈی جی والڈ سٹی اتھارٹی آف لاہور نے وزیراعلی محسن نقوی کو شالامار باغ کی بحالی کے پراجیکٹ کے بارے میں بریفنگ دی۔صوبائی وزراء عامر میر،اظفر علی ناصر،سیکرٹری سیاحت راجہ جہانگیر انور،چیئرمین بورڈ آف گورنرز پنجاب انسٹی ٹیوٹ آف کارڈیالوجی ڈاکٹر فرقد عالمگیر،سی سی پی او،کمشنر لاہور،ڈپٹی کمشنر لاہور،ڈی جی پی ایچ اے،ڈی جی پی آر اور متعلقہ حکام بھی اس موقع پر موجود تھے۔وزیراعلیٰ محسن نقوی نے جلو پارک اور بوٹینیکل گارڈن جلو کا بھی دورہ کیا۔جلوپارک میں ٹوٹی سڑکیں اور صورتحال خراب تھی جس پر وزیراعلیٰ محسن نقوی نے برہمی کا اظہار کیا اور جلو پارک کو اپ گریڈ کرنے کا پلان طلب کرلیا۔وزیراعلیٰ محسن نقوی نے پارک کاانتظام محکمہ جنگلات سے پی ایچ اے کو دینے کے لئے فوری اقدامات کی ہدایت کی اور کہا کہ جلو پارک کو بہتر بنانے کے لئے جلد اقدامات کئے جائیں۔ وزیراعلیٰ محسن نقوی نے پی ایچ اے کے زیر انتظام بوٹینیکل گارڈن جلو کا بھی تفصیلی وزٹ کیا۔ وزیراعلیٰ محسن نقوی بوٹینیکل گارڈ ن میں تفریحی پل پر گئے اور پورے گارڈن کا جائزہ لیا۔وزیراعلیٰ محسن نقوی نے پل کی سیڑھیوں پر پینٹ او رلکڑی کے پشتوں کو تبدیل کرنے کی ہدایت کی۔وزیراعلیٰ محسن نقوی نے تتلی گھر کا بھی معائنہ کیا۔وزیراعلیٰ محسن نقوی نے کہا کہ بوٹینیکل گارڈن میں مزیدمنفرد درخت او رپھول دارپودے لگائے جائیں.