وزیراعلیٰ کا ایک اور کسان دوست اقدام،پنجاب میں 10سال بعد17ہزارکلو میٹرنہروں کی بھل صفائی مہم شروع،محسن نقوی نے لاہور نہرسے مہم کا افتتاح کیا
بھل صفائی کی تکمیل سے تین سے چار لاکھ ایکڑ اراضی کو پانی میسر ہوگا، مانیٹرنگ کیلئے پاکستان آرمی کے ادارے لمز کی خدمات حاصل کی ہیں, لاہور کی نہر میں بعض مقامات پر ڈرینج کا پانی مکس ہونے کی شکایات موصول ہوئی ہیں،ڈپٹی کمشنر کی سربراہی میں کمیٹی قائم کر دی ہے، تحقیقات کریں گے
لاہور پاکستان(نمائندہ وائس آف جرمنی):وزیراعلیٰ محسن نقوی کا ایک اور کسان دوست اقدام،پنجاب میں 10سال بعد17ہزارکلو میٹرنہروں کی بھل صفائی مہم کا آج سے باقاعدہ آغاز کر دیا گیا ہے۔وزیراعلیٰ محسن نقوی نے مسلم ٹاؤن موڑ کے قریب لاہور نہرسے بھل صفائی مہم کا افتتاح کیا۔وزیراعلی محسن نقوی نے صوبائی وزراء ایس ایم تنویر،عامر میر،اظفر علی ناصر،کمشنر لاہور،سیکرٹری آبپاشی،سی سی پی او،ڈپٹی کمشنر، سی ٹی او اور دیگر حکام کے ہمراہ نہر میں کسی کے ساتھ بھل صفائی مہم کا آغاز کیا۔وزیراعلی محسن نقوی نے کرین کے ذریعے بھی بھل صفائی مہم باقاعدہ شروع کی۔وزیراعلی محسن نقوی نے کہا کہ پہلے مرحلے میں بھل صفائی مہم 31جنوری تک جاری رہے گی۔دوسرے مرحلے میں فروری سے مارچ تک 5000کلو میٹر نہروں کے کناروں کی مرمت و بحالی کی جائے گی۔ بھل صفائی کی تکمیل سے تین سے چار لاکھ ایکڑ اراضی کو پانی میسر ہوگا۔وزیراعلی محسن نقوی کو سیکرٹری آبپاشی نے بھل صفائی مہم کے بارے میں بریفنگ دی۔وزیراعلی محسن نقوی نے میڈیا سے گفتگوکرتے ہوئے کہا کہ کافی سال بعد بھل صفائی مہم کا آغاز کر دیا گیا ہے اور پہلے مرحلے میں 17ہزار کلومیٹر نہروں کی بھل صفائی ہو گی۔ وزیراعلی نے کہا کہ بھل صفائی کی مانیٹرنگ کیلئے پاکستان آرمی کے ادارے لمز کی خدمات حاصل کی ہیں۔لمز دن رات بھل صفائی مہم کی مانیٹرنگ کرے گا۔کمشنرز،ڈپٹی کمشنرز،محکمہ آبپاشی کے انجینئرز اور متعلقہ افراد کی لمز سے تربیت کرائی گئی ہے۔بھل صفائی کی مسلسل مانیٹرنگ کی جائے گی۔ وزیراعلی محسن نقوی نے کہا کہ لاہور کی نہر میں بعض مقامات پر ڈرینج کا پانی مکس ہونے کی شکایات موصول ہوئی ہیں،ڈپٹی کمشنر کی سربراہی میں کمیٹی قائم کر دی ہے۔ڈپٹی کمشنر اور ایم ڈی واسا نہر کا جائزہ لیں گے اور تحقیقات کریں گے۔لاہور کی نہر میں ڈرینج کا پانی مکس نہیں ہونے دے سکتے۔ وزیراعلی نے کہا کہ نیسپاک بطور تھرڈ پارٹی کنسلٹنٹ بھل صفائی کی مانیٹرنگ کرے گا۔سٹیلائٹ امیج سے بھل صفائی کی مانیٹرنگ ہو گی۔انہوں نے کہا کہ افسوس سے کہنا پڑتا ہے کہ نہر میں شہری گندگی ڈال رہے ہیں۔شہریوں کو احساس ہونا چاہیے کہ کوڑا کرکٹ اور ڈرینج کا پانی نہر میں نہیں ڈالنا۔ ہر کام حکومت اکیلے نہیں کر سکتی،شہریوں کو ساتھ دینا چاہیے۔وزیراعلی محسن نقوی نے کہا کہ 26ہزار الیکٹرک بائیکس اور الیکٹرک رکشے بلا سود دئیے جا رہے ہیں۔پارکنگ کی جگہ مختص کئے بغیر کوئی بلڈنگ منظور نہیں ہو رہی۔صوبائی وزراء ایس ایم تنویر،عامر میر،اظفر علی ناصر،کمشنر لاہور،سیکرٹری آبپاشی،سیکرٹری زراعت، سی سی پی او،ڈپٹی کمشنر، سی ٹی او اور دیگر حکام بھی اس موقع پر موجود تھے۔
