محکموں کو سالانہ ترقیاتی پروگرام 2024-25 کی تیاری میں ٹائم لائنز پر عمل کا حکم

پاکستان لاہور(نمائندہ وائس آف جرمنی):چیف سیکرٹری پنجاب زاہد اختر زمان نے تمام محکموں کو سالانہ ترقیاتی پروگرام 2024-25 کی تیاری کے سلسلے میں جاری کی گئی ٹائم لائنز پر عمل یقینی بنانے کی ہدایت کی ہے۔انہوں نے یہ ہدایت آج یہاں سول سیکرٹریٹ میں منعقد ایڈمنسٹریٹو سیکرٹریز کمیٹی کے اجلاس کی صدارت کرتے ہوئے کی جس میں سالانہ ترقیاتی پروگرام 2024-25کی تیاری کا تفصیلی جائزہ لیا گیا۔چیف سیکرٹری نے کہا کہ ہر محکمہ کم از کم پانچ ہائی امپیکٹ منصوبے اورتین پبلک پرائیویٹ پارٹنرشپ سکیمیں تیار کرے اورترقیاتی منصوبوں کی تیاری میں مفاد عامہ کو خصوصی طور پر مدنظر رکھا جائے۔ انہوں نے کہا کہ تعلیم، صحت اور توانائی کے شعبوں میں پبلک پرائیویٹ پارٹنرشپ کے وسیع مواقع موجود ہیں۔چیئرمین پلاننگ اینڈ ڈویلپمنٹ افتخار سہو نے اجلاس کو بریفنگ دی۔ انہوں ے بتایا کہ سالانہ ترقیاتی پروگرام 2024-25 کی تیاری کے سلسلے میں گائیڈ لائنز جاری کر دی گئی ہیں اور ہر محکمے کیلئے فنانشل سیلنگ مقرر کی گئی ہے۔ اجلاس میں ایڈیشنل چیف سیکرٹری (جنوبی پنجاب)، سینئر ممبر بورڈ آف ریونیو اور تمام محکموں کے ایڈمنسٹریٹو سیکرٹریز نے شرکت کی۔