![](https://vogurdunews.de/wp-content/uploads/2024/02/screenshot_2_-780x470.webp)
سندھ اسمبلی کے اراکین نے حلف اٹھا لیا
سندھ اسمبلی کے سپیکر آغا سراج درانی نے نومنتخب اراکین سے حلف لے لیا ہے۔
آج 168 اراکین کے ایوان میں 147 اراکین نے حلف اٹھایا۔ ایوان میں پیپلز پارٹی کے 114 نومنتخب اراکین ہیں جن میں نادر مگسی نے جیپ ریلی میں شرکت جبکہ جام مہتاب ڈہر اور نثار کھوڑو نے سینٹ میں ووٹ دینے کے باعث آج حلف نہیں اٹھایا۔
ایوان میں ایم کیو ایم کے اراکین کی تعداد 36 ہے۔
اردو نیوز کے نامہ نگار کے مطابق 9 آزاد، تین جی ڈی اے اور جماعت اسلامی کے ایک ممبر نے حلف نہیں اٹھایا۔
تین مخصوص نشستوں پر الیکشن کمیشن کا فیصلہ تاحال نہیں آیا جبکہ دو جنرل نشستوں پر انتخابات نہیں ہوئے۔
اجلاس کے آغاز پر سپیکر آغا سراج درانی نے آج کے سیشن میں خود بھی حلف اٹھایا۔
اس کے بعد اراکین نے سندھی، اردو اور انگریزی زبانوں میں حلف اٹھایا۔ سپیکر اور ڈپٹی سپیکر کے شیڈول بھی جاری کر دیے گئے جن کا انتخاب کل بروز اتوار ہو گا۔ جبکہ قائد ایوان کا انتخاب پیر کے روز متوقع ہے۔
پنجاب اسمبلی میں سپیکر اور ڈپٹی سپیکر کے انتخاب کے لیے پولنگ بوتھ قائم
پنجاب اسمبلی میں سپیکر اور ڈپٹی سپیکر کے انتخاب کے لیے دو پولنگ بوتھ قائم کر دیے گئے۔
سیکریٹری پنجاب اسمبلی نے کہا ہے کہ سپیکر اور ڈپٹی سپیکر کے انتخاب کے حوالے سے اسمبلی سیکریٹریٹ نے انتظامات کو حتمی شکل دے دی ہے۔
بوتھ کے اردگرد پردے لگا کر رازداری کو یقینی بنایا گیا ہے۔
سندھ اسمبلی کا اجلاس شروع، احتجاج کرنے والے متعدد سیاسی کارکن گرفتار
سندھ اسمبلی کا اجلاس سپیکر آغا سراج درانی کی صدرات میں شروع ہو گیا ہے۔ آج نومنتخب اراکین حلف اٹھائیں گے۔
نامزد وزیراعلٰی مراد علی شاہ بھی سندھ اسمبلی پہنچ گئے ہیں۔ اجلاس 38 منٹ تاخیر سے شروع ہو گیا۔
دوسری جانب سندھ اسمبلی کے باہر احتجاج کرنے والے جی ڈی اے کے متعدد سیاسی کارکنوں کو حراست میں لے لیا گیا۔
اپوزیشن جماعتیں جی ڈی اے، پی ٹی آئی، جماعت اسلامی اور جے یو آئی (ف) احتجاج کر رہی ہیں۔
کس قانون کے تحت ہمیں شہر میں داخل نہیں ہونے دیا جا رہا؟ جے یو آئی ف
جمعیت علمائے اسلام (ف) کے کارکنان کو روکنے کی وجہ سے کراچی حیدرآباد موٹروے پر ٹریفک معطل ہے۔
جے یوآئی سندھ کے سیکریٹری جنرل علامہ راشد محمود سومرو کی قیادت میں کارکنان کا کراچی ٹول پلازہ پر دھرنا جاری ہے۔
علامہ راشد محمود سومرو کا کہنا ہے کہ ’ہم سندھ اسمبلی کے باہر دھرنا دینا چاہتے۔ پرامن احتجاج ہمارا آئینی حق ہے۔ ہمارا حق چھینا جا رہا ہے۔‘
ان کا کہنا تھا کہ ’آئی جی سندھ بتائیں ہمیں کس قانون کے تحت شہر میں داخل ہونے نہیں دیا جا رہا۔‘
احتجاج کرنے والوں سے نمٹنے کے لیے انتظام کیا گیا ہے، آغا سراج درانی
سندھ اسمبلی کے سپیکر آغا سراج درانی نے کہا ہے کہ اسمبلی کی توہین برداشت نہیں کریں گے،
انہوں نے ایک بیان میں کہا کہ احتجاج کرنے والوں سے نمٹنے کے لیے انتظام کیا گیا ہے۔
ان کا کہنا تھا کہ کل سپیکر اور ڈپٹی سپیکر کا انتخاب کیا جائے گا۔
دوسری جانب نامزد وزیراعلٰی مراد علی شاہ نے کہا ہے کہ ’ہم حلف اٹھائیں گے لوگ احتجاج کرتے رہیں۔‘
سندھ اسمبلی کے اجلاس کی وجہ سے کراچی میں شاہراہ فیصل پر بدترین ٹریفک جام ہے۔
پنجاب اسمبلی میں سپیکر اور ڈپٹی سپیکر کا انتخاب آج ہو گا
پنجاب اسمبلی میں سپیکر اور ڈپٹی سپیکر کا انتخاب آج ہو گا جس کے لیے پاکستان مسلم لیگ ن اور سنی اتحاد کونسل نے اپنے امیدواروں کا اعلان کیا ہے۔
ارکان اسمبلی خفیہ رائے شماری کے ذریعے سپیکر اور ڈپٹی سپیکر کا انتخاب کریں گے۔
سپیکر کے لیے مسلم لیگ ن کے ملک محمد احمد خاں اور سنی اتحاد کونسل کے ملک احمد خاں بچھڑ کے درمیان مقابلہ ہو گا۔
ڈپٹی سپیکر کے لیے ن لیگ کے ملک ظہیر اقبال چنڑ اور سنی اتحاد کونسل کے معین ریاض کے درمیان مقابلہ ہو گا۔