ہدف کے تعاقب میں قلندرز کو ابتدائی نقصان، فخر زمان پویلین روانہ

پاکستان سپر لیگ کے 14ویں میچ میں آج دفاعی چیمپین لاہور قلندرز اور ملتان سلطانز لاہور کے قذافی سٹیڈیم میں مدمقابل ہیں۔ملتان سلطانز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں چار وکٹوں کے نقصان پر جیت کے لیے 215 رنز کا ہدف دیا ہے۔اس وقت ملتان سلطانز کے خلاف ہدف کے تعاقب میں لاہور قلندرز کی بیٹنگ جاری ہے۔ اب سے کچھ دیر پہلے تک لاہور قلندرز نے پانچ اوورز میں ایک وکٹ کے نقصان پر 37 رنز بنائے ہیں۔صاحبزادہ فرحان اور راسی وینڈر ڈوسن وکٹ پر موجود ہیں۔ قلندرز کو پہلا نقصان فخر زمان کی صورت میں اس وقت ہوا جب وہ 23 رنز بنا کر آفتاب ابراہیم کا شکار بنے۔
ملتان سلطانز کی اننگز
ملتان سلطانز کو بیٹنگ کے آغاز ہی میں کپتان محمد رضوان کی وکٹ کا نقصان اٹھانا پڑا۔محمد رضوان پہلے اوور کی پانچویں گیند پر شاہین شاہ آفریدی کے ہاتھوں صفر پر کلین بولڈ ہوئے۔رضوان کی وکٹ کے بعد ریزا ہینڈرکس اور عثمان خان نے 60 سے زائد رنز کی شراکت داری میں بیٹنگ سنبھالی۔ریزا ہینڈرکس سکندر رضا کی گیند پر 40 رنز بنا کر صاحبزادہ فرحان کے ہاتھوں کیچ آؤٹ ہوئے۔ طیب طاہر نے نے 14 رنز بنائے اور بریتھ ویٹ کی گیند پر لمبی شاٹ کھیلنے کی کوشش میں جہانداد خان کو کیچ دے بیٹھے۔عثمان خان نے 55 گیندوں پر 96 رنز کی زبردست اننگز کھیلی مگر وہ سینچری مکمل نہ کرسکے، 19ویں اوور کی چوتھی گیند پر وہ اپنی پہلی اور ایوینٹ کی تیسری سینچری مکمل کرنے کی کوشش میں سلمان فیاض کے ہاتھوں کیچ ہوجانے سے آؤٹ ہوئے.لاہور قلندرز کے شاہین شاہ آفریدی دو جبکہ سکندر رضا اور کارلوس بریتھ ویٹ ایک ایک وکٹ حاصل کرنے میں کامیاب رہےلاہور قلندرز کی قیادت شاہین شاہ آفریدی کر رہے ہیں جبکہ ملتان سلطانز کے کپتان محمد رضوان ہیں۔
پی ایس ایل سیزن 9 میں دونوں ٹیموں کے مابین یہ دوسرا مقابلہ ہے۔ 21 فروری کو ملتان میں کھیلے گئے پہلے میچ میں لاہور قلندرز کو ملتان سلطانز نے پانچ وکٹوں سے شکست دی تھی۔رواں سیزن میں دفاعی چیمپین لاہور قلندرز ابھی تک کوئی بھی میچ نہیں جیت پائی ہے۔لاہور قلندرز کو پشاور زلمی ، کراچی کنگز، ملتان سلطانز، کوئٹہ گلیڈی ایٹڑز اور اسلام آباد یونائیٹڈ کے خلاف کھیلے گئے میچز میں شکست کا سامنا کرنا پڑا۔پوائنٹس ٹیبل پر لاہور قلندرز کے پاس کوئی بھی پوائنٹ موجود نہیں ہے۔
ملتان سلطانز کی پی ایس ایل میں اب تک شاندار کارگردگی رہی ہے۔پشاور زلمی کے خلاف کھیلے گئے میچ کے علاوہ سلطانز پانچ میں سے چار مقابلے اپنے نام کرنے میں کامیاب رہے ہیں۔ یوں پوائنٹس ٹیبل پر ملتان سطانز آٹھ پوائنٹس کے ساتھ پہلے نمبر پر ہے۔
لاہور قلندرز کا سکواڈ
فخر زمان، صاحبزادہ فرحان، راسی وینڈر ڈوسن، کامران غلام، سکندر رضا، جیورج لنڈے، کارلوس بریتھ ویٹ، جہان داد خان، شاہین شاہ آفریدی( کپتان)، سلمان فیاض اور زمان خان شامل ہیں
ملتان سلطانز کا سکواڈ
محمد رضوان(کپتان)، عثمان خان، ریزا ہنڈرکس، طیب طاہر، افتخار احمد، خوشدل شاہ، اسامہ میر، آفتاب ابراہیم، فیصل اکرم، محمد علی اور شاہنوازدانی شامل ہیں