اللہ تعالی نے جو ذمہ داری دی ہے اسے بطریق احسن ادا کرنے کی پوری کوشش کروں گا‘ محسن نقوی
ٹیم ورک پر یقین رکھتا ہوں اور ٹیم ورک سے بہترین نتائج حاصل ہوتے ہیں‘ وفاقی وزیر داخلہ وانسداد منشیات
لاہور پاکستان( نمائندہ وائس آف جرمنی) وفاقی وزیر داخلہ و انسداد منشیات محسن نقوی نے کہا ہے کہ اللہ تعالی نے جو ذمہ داری دی ہے اسے بطریق احسن ادا کرنے کی پوری کوشش کروں گا،وکلا برادری کے لئے جو کچھ کر سکتا تھا وہ کیا ہے ،وکلا برادری میرے دل کے قریب ہے۔ وفاقی وزیر داخلہ و انسداد منشیات محسن نقوی کے اعزاز میں مقامی ہوٹل میں خصوصی تقریب کا انعقاد کیا گیا ۔
تقریب میں وفاقی وزیر قانون سینٹر اعظم نذیر تارڑ،ایڈووکیٹ جنرل پنجاب،سابق صدر سپریم کورٹ بار احسن بھون، پاکستان ، پنجاب بار کونسل اور دیگر بار ایسوسی ایشنز کے عہدیداران نے شرکت کی ۔وکلا ء رہنمائوں نے وزیر اعلی پنجاب کی حیثیت سے بے مثال کارکردگی پر محسن نقوی کو زبردست خراج تحسین پیش کرتے ہوئے کہا کہ محسن سپیڈ نے ہر سطح پر خود کو منوایاِمحسن نقوی نے مختصر عرصے میں حیران کن رفتار کے ساتھ عوامی منصوبوں کو مکمل کیا ۔
وکلا رہنمائوں نے وفاقی وزارت کے منصب پر فائز ہونے پر محسن نقوی کو مبارکباد دی اور نیک خواہشات کا اظہار کیا ۔محسن نقوی نے کہا کہ ٹیم ورک پر یقین رکھتا ہوں اور ٹیم ورک سے بہترین نتائج حاصل ہوتے ہیں،وکلا ء رہنمائوں نے وکلا برادری کی فلاح وبہبود کیلئے ریکارڈ کام پر محسن نقوی کا شکریہ ادا کیا۔
