وزیر اعلیٰ مریم نواز شریف نے مریضوں کی ایمرجنسی منتقلی کیلئے اپنا ہیلی کاپٹر استعمال کرنے کی اجازت دیدی
موٹروے پر بھی ریسکیو 1122سروس شروع کی جائے گی، بہت جلد ائیر ایمبولینس سروس کاآغاز بھی کردیاجائے گا، اجلاس میں ایئر ایمبولینس پراجیکٹ پر بریفنگ
لاہور پاکستان(نمائندہ وائس آف جرمنی):وزیر اعلیٰ پنجاب مریم نواز شریف نے مریضوں کی ایمرجنسی منتقلی کے لئے اپنا ہیلی کاپٹر استعمال کرنے کی اجازت دے دی ہے۔وزیر اعلیٰ مریم نواز شریف نے کہا کہ موٹروے پر بھی ریسکیو 1122سروس شروع کی جائے گی اورپنجاب میں بہت جلد ائیر ایمبولینس سروس کاآغاز بھی کردیاجائے گا۔ انہوں نے کہا کہ ہمارے لوگ بروقت ہسپتال نہ پہنچنے کی وجہ سے ہی زندگی کی بازی ہار جاتے ہیں۔ دور دراز علاقو ں میں حادثے کی صورت میں متاثرین کو بروقت ہسپتال پہنچانا ناگزیر ہے۔سرگودھا ہسپتال میں ہارٹ ٹیک کے مریض کو بے بس دیکھ کر دلی دکھ ہوا۔وزیر اعلیٰ مریم نواز شریف کی زیر صدارت اجلاس میں ایئرایمبولینس پراجیکٹ پر تفصیلی بریفنگ دی گئی۔سینئر صوبائی وزیر مریم اورنگزیب،صوبائی مشیر پرویز رشید، صوبائی وزیر سپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق، صوبائی وزیرپرائمری اینڈ سیکنڈری ہیلتھ خواجہ عمران نذیر، چیف سیکرٹری،چیئرمین پی اینڈ ڈی، سیکرٹری فنانس، ڈاکٹر عدنان، سیکرٹری ایمرجنسی ڈیپارٹمنٹ اور دیگرمتعلقہ حکام نے اجلاس میں شرکت کی۔
