نیب لاہور کے انٹیلی جنس ونگ نے جعلی چیئرمین نیب کو ساتھی سمیت گرفتار کر لیا

پاکتان لاہور (منائندہ وائس آف جرمنی):نیب لاہور کے انٹیلی جنس ونگ نے لاہور میں اہم کارروائی کرتے ہوئے جعلی چیئرمین نیب کو ساتھی سمیت گرفتار کر لیا ہے۔ دونوں ملزمان اویس ظہور اور عامر ظہور کو سادہ لوح شہریوں کو نیب سینئر افسر کے نام پر بلیک میلنگ اور بھاری رقوم وصول کرنے کے الزامات پر گرفتار کیا گیا ہے۔تفصیلات کے مطابق دو ملزمان اویس ظہور اور عامر ظہور کیخلاف نیب کے سینئر آفیسر کا نام استعمال کرتے ہوئے شہریوں کو ڈرا دھمکا کر اور غیر ضروری دبائو ڈالتے ہوئے غیر قانونی طور پررقوم وصول کرنے کی شکایات موصول ہوئیں جن پر نیب کے اعلی حکام کیجانب سے فوری کارروائی کے احکامات صادر کئے گئے۔
نیب لاہور انٹیلی جنس ونگ کیجانب سے ان احکامات پر باقاعدہ کارروائی کرتے ہوئے دو ملزمان کو رنگے ہاتھوں گرفتار کرلیا گیا ہے جنہیں مزید تحقیقات کیلئے تھانہ چونگ کے حوالہ کر دیا گیا ہے۔ نیب لاہور اس سے قبل بھی متعدد جعلی نیب افسران (impersonators) کی گرفتاری عمل میں لاچکا ہے۔ نیب لاہور کی جآنب سے اس ضمن میں آگاہ کیا جاتا ہے کہ نیب سے متعلقہ کسی بھی مشکوک صورتحال یا شکایت کیصورت میں نیب انٹیلی جنس ونگ یا ترجمان نیب سے فوری رابطہ کیا جائے۔