پاکستان میں غیرقانونی اور ماحول دشمن ٹینریز کے خلاف کریک ڈاؤن، 5 ٹینریز سیل

قصور ( اصغر واہلہ خصوصی نمائندہ) – ڈپٹی کمشنر قصور و مینیجنگ ڈائریکٹر قصور ٹینری ویسٹ مینجمنٹ ایجنسی (KTWMA) عمران علی کی ہدایت پر محکمہ ماحولیات، KTWMA اور پولیس نے مشترکہ کارروائی کرتے ہوئے قصور شہر میں غیر رجسٹرڈ، ماحولیات کے قوانین کی خلاف ورزی کرنے والی اور ڈسپوزل سسٹم کے بغیر چلنے والی پانچ ٹینریز کو سیل کر دیا۔

آپریشن کے دوران جن ٹینریز کو بند کیا گیا ان میں:

• ایم زیڈ ٹینری

• مولوی عاشق ٹینری

• شفیع / شفیق ٹینری

• ایم ایچ فیبرکس ٹینری

• محمد زبیر ٹینری شامل ہیں۔

ماحولیاتی قوانین کی خلاف ورزی اور متعدد نوٹسز کے باوجود بے حسی

حکام کے مطابق ان ٹینریز کو متعدد بار تحریری نوٹسز کے ذریعے ہدایت کی گئی تھی کہ وہ ڈسپوزل سسٹم تعمیر کریں اور اسے KTWMA کے چینلز کے ساتھ منسلک کریں۔ تاہم، ان اداروں نے نہ صرف ان ہدایات پر عملدرآمد سے گریز کیا بلکہ رجسٹریشن جیسے بنیادی قانونی تقاضے بھی پورے نہیں کیے۔

نتیجتاً، قانون کی خلاف ورزی، ماحولیاتی آلودگی میں اضافے اور عدالتی احکامات کی روشنی میں، ان ٹینریز کے خلاف کارروائی کرتے ہوئے ان کو فوری طور پر سیل کر دیا گیا۔

"کسی کو بھی ماحول دشمن سرگرمیوں کی اجازت نہیں دی جائے گی”: عمران علی

ڈپٹی کمشنر قصور عمران علی نے اس موقع پر میڈیا سے گفتگو کرتے ہوئے کہا:

"لاہور ہائیکورٹ اور محکمہ ماحولیات کی واضح ہدایات کی روشنی میں کسی کو بھی نئی ٹینری لگانے کی اجازت نہیں، جبکہ موجودہ رجسٹرڈ ٹینریز کے لیے یہ لازمی ہے کہ وہ ڈسپوزل سسٹم تعمیر کرکے KTWMA کے ساتھ منسلک ہوں۔”

انہوں نے مزید کہا کہ جو ٹینریز ماحولیاتی آلودگی کا باعث بن رہی ہیں، ان کے خلاف بلاامتیاز اور سخت کارروائیاں جاری رہیں گی، چاہے وہ کسی بھی اثر و رسوخ کی حامل ہوں۔

تمام آپریٹنگ ٹینریز کے لیے واضح ہدایات

ڈپٹی کمشنر کے مطابق، اس وقت قصور شہر کے چاروں ٹینری کلسٹرز میں جو ٹینریز کام کر رہی ہیں، اُن سب کے لیے درج ذیل اقدامات لازمی قرار دیے گئے ہیں:

• محکمہ ماحولیات سے باقاعدہ رجسٹریشن

• ڈسپوزل سسٹم کی تعمیر

• KTWMA کے نکاسی چینلز سے ربط

• ماحولیاتی قوانین پر مکمل عمل درآمد

انہوں نے کہا کہ:

"کسی بھی غیر رجسٹرڈ، ماحول دشمن ٹینری کو چلنے کی اجازت نہیں دی جائے گی۔ ماحولیاتی تحفظ ہماری ترجیح ہے اور قصور شہر کے ماحول کو آلودگی سے پاک کرنے کے لیے ہر ممکن اقدام اٹھایا جائے گا۔”

ادارہ نوٹ:

قصور جیسے صنعتی شہروں میں ٹینری انڈسٹری ماحولیاتی آلودگی کا ایک بڑا ذریعہ رہی ہے۔ حالیہ کارروائی ماحول دوست اقدامات کے ضمن میں ایک خوش آئند قدم ہے، جس سے نہ صرف شہریوں کی صحت پر مثبت اثر پڑے گا بلکہ عالمی ماحولیاتی معیارات کے حصول میں بھی مدد ملے گی۔