وزیراعلیٰ مریم نوازشریف نے سالڈ ویسٹ مینجمنٹ کا ماڈل میکنزم نافذ کرنے کی ڈیڈ لائن مقررکردی،سوا لاکھ تک نئی ملازمتیں پیدا ہوں گی

لاہور پاکستان(نمائندہ وائس آف جرمنی): وزیراعلیٰ پنجاب مریم نوازشریف نے سالڈ ویسٹ مینجمنٹ کا ماڈل میکنزم نافذ کرنے کی ڈیڈ لائن مقررکرتے ہوئے ماڈل میکنز م کا پلان طلب کر لیا۔وزیراعلیٰ مریم نواز شریف نے کاشتکاروں پر صفائی ٹیکس لگانے کی تجویز مسترد کر دی۔وزیر اعلیٰ مریم نواز شریف کی زیر صدارت آج وزیراعلیٰ آفس میں صوبہ بھر میں سالڈ ویسٹ مینجمنٹ سسٹم کے حوالے سے اجلاس منعقدہوا،اجلاس میں صوبہ بھر میں صفائی کا نظام آؤٹ سورس کرنے کی تجویز پر اتفاق کیاگیا۔ صوبے کے ہر ڈویژن میں 23مجوزہ لینڈ فل سائٹس کا پلان پیش کیاگیا۔ساہیوال میں فنکشنل سالڈ ویسٹ مینجمنٹ سسٹم کا جائزہ لیاگیا، دیگر شہروں میں نافذ کرنے پر غور کیاگیا۔وزیراعلیٰ مریم نوازشریف نے ہر ڈویژن میں کچرے کی سیگریگیشن پلانٹ نصب کرنے کا جائزہ لینے کی ہدایت کی۔عوام کو صفائی کی سہولت یقینی بنانے کیلئے لوکل کمیونٹی کمیٹی بنانے اورساہیوال اور سرگودھا میں ویسٹ مینجمنٹ کمپنی بنانے کی تجویزپر غور کیاگیا۔وزیراعلیٰ مریم نوازشریف نے کہاکہ صفائی کے نئے نظام سے سوا لاکھ تک نئی ملازمتیں پیدا ہوں گی۔ پنجاب بھر میں صفائی کا پائیدار او رموثر نظام لائیں گے اور ماڈل سروسز مہیا کی جائیں گی۔ ہر گلی، محلے او ردیہات کی صفائی کا پائیدار نظام نافذ کیاجائے گا۔ وزیراعلیٰ مریم نوازشریف نے کہاکہ گاؤں اوردیہات کا دورہ کرکے خود صفائی کے نظام کے بارے میں جائزہ لوں گی۔ دیہات میں کمیونٹی کے اشتراک سے گلی، محلے کو صاف ستھرا بنائیں گے۔ لوکل کمیونٹی کو صفائی مہم کی کارکردگی کی مانیٹرنگ کیلئے شامل کیا جائے۔ صفائی ہونے سے نہ صرف ماحول بہتر ہوگا بلکہ بیماریاں او رآلودگی بھی کم ہوگی۔ لاہور میں وزٹ کے دوران کئی گلیوں میں گندگی کی وجہ سے گزرنا مشکل تھا۔ صوبائی مشیر پرویز رشید، صوبائی وزیر لوکل گورنمنٹ اینڈ کمیونٹی ڈویلپمنٹ ذیشان رفیق، ایم پی اے ثانیہ عاشق، چیف سیکرٹری، سیکرٹری ٹرانسپورٹ، فنانس، لوکل گورنمنٹ اینڈ کمیونٹی ڈویلپمنٹ، سپیشل سیکرٹری لوکل گورنمنٹ،کمشنر لاہور، ڈپٹی کمشنر لاہور،چیف ایگزیکٹو آفیسر لاہور سالڈ ویسٹ مینجمنٹ کمپنی،ایکسپرٹ ڈاکٹر کامران،سالڈ ویسٹ مینجمنٹ ایکسپرٹ احسن بیلہ اور دیگر متعلقہ حکام نے اجلاس میں شرکت۔