پاکستان پیپلز پارٹی (پی پی پی) نے سردار لطیف کھوسہ کی سینٹرل ایگزیکٹو کمیٹی کی رکنیت معطل کرنے کا اعلان کیا ہے۔
جمعے کو پاکستان پیپلز پارٹی کی جانب سے جاری بیان میں کہا گیا کہ ’سیکریٹری جنرل پیپلز پارٹی سید نیر حسین بخاری نے سردار لطیف کھوسہ کی رکنیت معطل کر دی ہے۔‘
بیان کے مطابق ’یہ فیصلہ پیپلز پارٹی کی سینٹرل ایگزیکٹو کمیٹی نے کیا ہے۔‘
’سیکریٹری جنرل پیپلزپارٹی سید نیر حسین بخاری نے ایک ہفتہ قبل سردار لطیف کھوسہ کو شوکاز نوٹس جاری کیا تھا۔ سردار لطیف کھوسہ نے مدّت پوری ہونے کے باوجود شوکاز نوٹس کا جواب نہیں دیا۔‘
لطیف کھوسہ کو جاری کیے گئے نوٹس میں کہا گیا تھا کہ ’سینٹرل ایگزیکٹو کمیٹی (سی ای سی) کے رکن ہونے کے باوجود پارٹی کی اجازت کے بغیر آپ کسی اور جماعت کے سربراہ کا کرپشن کیس میں دفاع کر رہے ہیں، جس میں ان کو سزا دی جا چکی ہے۔‘
نوٹس میں یہ بھجی کہا گیا تھا کہ ’ان(سیاسی جماعت کے سربراہ) کے خلاف آفیشل سکریٹ ایکٹ کے تحت درج مقدمے میں بھی آپ ان کا دفاع کر رہے ہیں۔‘
اس کے علاوہ سائفر کے معاملے پر ریاستی پالیسی کے تنقید کرنے کے بارے میں بھی ان سے استفسار کیا گیا تھا۔
نوٹس میں کہا گیا تھا کہ ’پارٹی پالیسی کی خلاف ورزی کرنے پر کیوں نہ آپ کے خلاف تادیبی کارروائی کی جائے۔‘
