طلباء کے انڈسٹری کے ساتھ روابط بڑھانے کے اقدامات کئے جارہے ہیں‘چوہدری شافع حسین
ملک وسائل کی دولت سے مالا مال ہے،ہرادارہ محنت سے کام کرے تو ملک کو کسی مالیاتی ادارے سے قرض لینے کی ضرورت نہیں رہے گی
لاہور پاکستان(نمائندہ وائس آف جرمنی): صوبائی وزیر صنعت و تجارت چوہدری شافع حسین نے سکول آف ڈیزائن اینڈ ٹیکسٹائل یوایم ٹی کے زیر اہتمام نمائش کا افتتاح کیا۔ایوان قائداعظم میں منعقدہ نمائش میں طلبہ و طالبات نے 170سٹالز لگائے۔صوبائی وزیر نے سٹالز کا معائنہ کیا اور طلباء کے تخلیقی کام کو سراہا۔صوبائی وزیر صنعت و تجارت چوہدری شافع حسین نے اس موقع پر میڈیاکے نمائندوں سے گفتگو کرتے ہوئے کہاکہ ہمارے طلبہ بہت باصلاحیت ہیں انہیں سپورٹ کی ضرورت ہے۔
طلباء کے انڈسٹری کے ساتھ روابط بڑھانے کے اقدامات کئے جارہے ہیں۔چوہدری شافع حسین نے کہاکہ ٹیکسٹائل سیکٹر میں بڑا پوٹینشل ہے اور اس سیکٹر کے ساتھ ہزاروں لوگوں کاروزگاروابستہ ہے۔ حکومت ٹیکسٹائل سیکٹر کے فروغ کے لئے قائداعظم بزنس پارک شیخوپورہ میں گارمنٹ سٹی بنا رہی ہے۔
ساڑھے 600ایکڑ رقبے پر بننے والا گارمنٹ سٹی سولر انرجی پر ہوگا ۔
انہوں نے کہاکہ کوشش ہے کہ پنجاب میں سولر پینلز مینوفیکچرنگ کا کارخانہ لگے۔متعدد غیر ملکی سولر کمپنیوں سے مفید بات چیت ہوئی ہے۔اگلے ماہ 2بڑے غیر ملکی سرمایہ کار گروپ پنجاب کا دورہ کر رہے ہیں ۔وزیرصنعت و تجارت پنجاب نے کہاکہ کپاس نقدآور فصل ہے اس کی پیداوار بڑھانے کی ضرورت ہے۔کاٹن سیڈپر پابندی اور کاٹن جنرز پر ٹیکسز کے خاتمے کیلئے وفاقی حکومت سے بات کروںگا۔
سپیشل اکنامک زونزز میں سرمایہ کاری پر 10سال تک انکم ٹیکس کی چھوٹ ہے۔ایک دفعہ ڈیوٹی فری مشینری کی درآمد کی سہولت بھی موجود ہے۔چوہدری شافع حسین نے کہاکہ آئی پی پیز کو بھی اب سولر انرجی کی طرف آنا ہوگاجب تک کالا باغ ڈیم کا مسئلہ حل نہیں ہوتا، چھوٹے ڈیمز بنانے پر توجہ دینا ہوگی ۔ صوبائی وزیر صنعت و تجارت نے کہاکہ ملک وسائل کی دولت سے مالا مال ہے۔ہرادارہ محنت سے کام کرے تو ملک کو کسی مالیاتی ادارے سے قرض لینے کی ضرورت نہیں رہے گی ۔ایک سوال کے جواب میں صوبائی وزیر نے کہاکہ ہر ملک اپنے معاملات خود دیکھ سکتا ہے، کسی دوسرے ملک کو مداخلت کی ضرورت نہیں۔ریکٹر یونیورسٹی ڈاکٹر آصف رضا، ڈاکٹر ممتاز حسین، ڈاکٹر مدثر عباس اور دیگر بھی اس موقع پر موجود تھے۔
