اسلام آباد پاکستان(نمائندہ وائس آف جرمنی): وفاقی وزیر برائے سرمایہ کاری بورڈ،نجکاری و مواصلات عبدالعلیم خان دوشنبے تاجکستان پہنچ گئے، دوشنبے ائیرپورٹ پر تاجکستان کے وزیر ٹرانسپورٹ عظیم ابراہیم نے ان کا والہانہ استقبال کیا۔منگل کو سرمایہ کاری بورڈ کی جانب سے جاری بیان کے مطابق تاجکستان میں شاندار استقبال پر وفاقی وزیر سرمایہ کاری عبدالعلیم خان نے عظیم ابراہیم سے اظہار تشکر کیا۔
وفاقی وزیر عبدالعلیم خان نے دوشنبے میں تاجکستان کے وزیر ٹرانسپورٹ کے دفتر کا دورہ کیا اور ا ن سے ملاقات کی۔اس موقع پر تاجکستان اور پاکستان کے مابین گہرے دوستانہ تعلقات کو مزید فروغ دینے کے عزم کا اظہار کیا گیا۔ فریقین نے کہا کہ تاجکستان سے چین اور افغانستان کے راستے پاکستان کی بلا واسطہ تجارت میں اضافہ کریں گے۔فریقین نے گواد ر اور کراچی کی بندرگاہوں کیلئے پائلٹ پراجیکٹ شروع کرنے پر بھی اتفاق کیا۔
وفاقی وزیر عبدالعلیم خان نے کہا کہ دو طرفہ تعلقات میں بہتری کیلئے پاکستان میں تاجکستان کے سفیر کے طور پر کام کروں گا، اچھے ہمسایہ ممالک کسی نعمت سے کم نہیں۔ انہوں نے کہا کہ تاجکستان سینٹرل ایشیا کیلئے گیٹ وے ثابت ہو سکتا ہے۔عبدالعلیم خان نے دوشنبے میں اکنامک ڈویلپمنٹ و ٹریڈ کے وزیر زوقی زودا زوقی امین سے بھی ملاقات کی۔ ملاقات کے دوران فریقین نے تاجکستان سے بزنس ٹو بزنس دوروں میں اضافے پر بھی اتفاق کیا۔
وفاقی وزیر تجارت نے کہا کہ پاکستان اور تاجکستان کو آرگینک ایکسپورٹکو بھی بڑھانا ہوگا۔ تاجکستان سے ہفتے میں ایک ڈائریکٹ فلائٹ پر وفاقی وزیر عبدالعلیم خان کی طرف سے تعاون کی یقین دہانی کرائی گئی ۔ وفاقی وزیر عبدالعلیم خان دوشنبے تاجکستان میں بدھ کو بھی مصروف ترین دن گزاریں گے۔
