وزیرداخلہ محسن نقوی کا رات گئے امام بارگاہ کا دورہ، سیکورٹی انتظامات کا جائزہ لیا۔ شرکاء نے انتظامات کو سراہا

اسلام آباد پاکستان(نمائندہ وائس آف جرمنی): وفاقی وزیرداخلہ محسن نقوی نے رات گئے G-6 میں مرکزی اثنا عشری امام بارگاہ کا دورہ کیا اور مجلس اور جلوس کے روٹ کا معائنہ کیا۔ وزیر داخلہ محسن نقوی نے مجالس کے سیکورٹی انتظامات کا جائزہ لیا اور مجلس کے شرکاء سے ملاقات کی اور انتظامات کے بارے دریافت کیا۔ شرکاء نے انتظامات کو سراہا اور اطمینان کا اظہار کیا۔ وزیر داخلہ محسن نقوی نے کہا کہ محرم الحرام کے دوران قیام امن کیلئے پولیس اور انتظامیہ الرٹ ہے۔
وزیرداخلہ محسن نقوی نے چیف کمشنر اسلام آباد محمد علی رندھاوا اور آئی جی اسلام آباد پولیس علی ناصر رضوی کو سکیورٹی انتظامات کے بارے ضروری ہدایات دیں۔ انہوں نے کہا کہ آج خود دورہ کرکے محرم الحرام سکیورٹی پلان کا جائزہ لیا۔ مجالس اور جلوسوں کے شرکاء کی حفاظت کے لئے فول پروف اقدامات کئے گئے ہیں۔ کنٹرول روم فعال ہے اور کیمروں کے ذریعے نگرانی کی جا رہی ہے۔چئیرمین سی ڈی اے و چیف کمشنر اسلام آباد محمد علی رندھاوا، آئی جی اسلام آباد پولیس علی ناصر رضوی، ڈی آئی جی علی رضا اور متعلقہ حکام بھی اس موقع پر موجود تھے۔